کراچی، 20 اپریل ( یو این آئی)پشاور زلمی کے کپتان بابر اعظم نے کوئٹہ گلیڈی ایٹرز کے خلاف اپنی زندگی کی بہترین ٹی ٹوئنٹی اننگز کھیل کر نہ صرف شائقین کے دل جیت لیے بلکہ کرکٹ کی تاریخ کے کئی بڑے ریکارڈز بھی اپنے نام کر لیے۔بابر اعظم نے محض 52 گیندوں پر ناقابلِ شکست سنچری اسکور کی، لیکن اس اننگز کی سب سے حیران کن بات یہ تھی کہ انہوں نے پوری اننگز میں صرف ایک ڈاٹ بال کھیلی۔ کرکٹ کی تاریخ میں یہ پہلا موقع ہے کہ کسی بلے باز نے ٹی ٹوئنٹی اننگز میں 50 یا اس سے زیادہ گیندیں کھیلیں اور صرف ایک گیند پر رن نہ بنایا ہو۔بابر اعظم نے اس اننگز کے ذریعے ویراٹ کوہلی اور کرس گیل جیسے عظیم کھلاڑیوں کو کئی شعبوں میں پیچھے چھوڑ دیا ہے۔بابر اعظم ٹی ٹوئنٹی کرکٹ میں 12,000 رنز مکمل کرنے والے تیز ترین کھلاڑی بن گئے ہیں (کوہلی اور گیل سے بھی تیز)۔ کوسل مینڈس کے ساتھ 135 رنز کی شراکت کے بعد بابر اعظم اب ٹی ٹوئنٹی میں 47 سنچری پارٹنرشپس کے ساتھ ویراٹ کوہلی کے برابر آگئے ہیں۔ یہ بابر کی مجموعی طور پر 12 ویں ٹی ٹوئنٹی سنچری ہے، جس کے بعد وہ ویراٹ کوہلی سے آگے نکل گئے ہیں۔ (کرس گیل 22 سنچریوں کے ساتھ اب بھی پہلے نمبر پر ہیں)۔ بابر ٹی ٹوئنٹی فارمیٹ میں 100 نصف سنچریاں مکمل کرنے والے تیز ترین کھلاڑی بن چکے ہیں۔رواں سیزن میں بابر اعظم 7 اننگز میں 401 رنز کے ساتھ سب سے زیادہ رنز بنانے والوں کی فہرست میں دوسرے نمبر پر ہیں، جبکہ ان کے ساتھی کھلاڑی کوسل مینڈس 413 رنز کے ساتھ پہلے نمبر پر براجمان ہیں۔
