ہانگزو (چین)، 4 ستمبر (یو این آئی) ہندوستانی خواتین کی ہاکی ٹیم خواتین ایشیا کپ 2025 میں اپنی مہم کا آغاز جمعہ کو تھائی لینڈ کے خلاف کرے گی۔کل سے شروع ہونے والی اپنی مہم سے قبل ہندوستانی کپتان سلیمہ ٹیٹے نے کہا اگرچہ تھائی لینڈ ایف آئی ایچ کی درجہ بندی میں ہم سے بہت نیچے ہے لیکن ہم انہیں یا کسی ٹیم کو آسان حریف نہیں سمجھ رہے ہیں اور ہم ہر میچ میں اپنی پوری طاقت لگائیں گے۔ یہ ایشیا کپ 2025 کا ہمارا پہلا میچ بھی ہوگا ۔ اگلے دن جاپان کا سامنا کرنے سے پہلے ہم بڑے فرق سے جیتنے کی کوشش کریں گے۔ہندوستان جاپان، تھائی لینڈ اور سنگاپور کے ساتھ پول بی میں ہے۔ ہندوستانی ٹیم جمعہ کو ہندوستانی وقت کے مطابق دوپہر 12 بجے تھائی لینڈ سے ٹکرائے گی۔ ٹیم اپنے پول میں ٹاپ پوزیشن کے ساتھ سپر فور میں جگہ بنانے کی کوشش کرے گی۔آنے والے میچوں کے بارے میں بات کرتے ہوئے ہندوستانی خواتین ہاکی ٹیم کے چیف کوچ ہریندر سنگھ نے کہا ہماری ٹیم میں نوجوان اور تجربہ کار کھلاڑیوں کا ایک اچھا امتزاج ہے اور اگرچہ ہم کچھ انجری کا شکار ہوئے ہیں، لیکن مجھے اب بھی یقین ہے کہ ٹیم اچھی کارکردگی کا مظاہرہ کرے گی۔ تھائی لینڈ کے خلاف میچ ہمیں اپنی طاقت کو جانچنے اور پرکھنے میں مدد دے گا اور ہماری خوبیوں اور خامیوں کی بھی نشاندہی ہو گی کہ اگلے دن جاپان سے سامنا کرنے سے پہلے ہمیں کیا کام کرنے کی ضرورت ہے۔ یہ بات قابل ذکر ہے کہ ہندوستانی ٹیم دو مرتبہ ویمنز ایشیا کپ جیت چکی ہے پہلے 2004 میں اور پھر 2017 میں، گزشتہ ایڈیشن میں ہندوستانی ٹیم ٹورنامنٹ میں تیسرے نمبر پر رہی تھی۔
