نئی دہلی، 30 مارچ (یو این آئی) ہندوستانی ہاکی کے باصلاحیت کھلاڑیوں کو اتوار کو یہاں ہاکی کی عظیم شخصیات کی موجودگی میں ان کی نمایاں خدمات کے لئے ہاکی انڈیا کے سالانہ ایوارڈز سے نوازا جائے گا۔اس سال ایوارڈز کی تقریب میں کل انعامی رقم 7 کروڑ 56 لاکھ روپے رکھی گئی ہے۔ آٹھ کیٹیگریز میں دیے گئے ان ایوارڈز کے لیے 32 کھلاڑیوں کو شارٹ لسٹ کیا گیا ہے۔ ان کھلاڑیوں کو 2023 کیلنڈر سال میں ہندوستانی ہاکی میں ان کی نمایاں شراکت کے لیے سراہا جائے گا۔اولمپیئنز رگھبیر لال، اے ایس بخشی، ہربندر سنگھ، اشوک دیوان، ظفر اقبال، اجیت پال سنگھ، رومیو جیمز، جگبیر سنگھ، ایم پی۔ سنگھ، اور ونیت کمار جیسی تجربہ کار شخصیات کو شامل کیا جائے گا، جبکہ ہاکی انڈیا کے صدر ڈاکٹر دلیپ ٹرکی، جنرل سکریٹری بھولا ناتھ سنگھ اور خزانچی شیکھر جے منوہرن کی موجودگی بھی توجہ کا مرکز ہوگی۔ہندوستانی فارورڈ ابھیشیک کو دو زمروں میں ان ایوارڈز کے لیے نامزد کیا گیا ہے، ہاکی انڈیا دھنراج پلے ایوارڈ برائے فارورڈ آف دی ایئر 2023 (مرد) اور ہاکی انڈیا بلبیر سنگھ سینئر ایوارڈ برائے پلیئر آف دی ایئر 2023 (مرد) نامزد کیا گیا ہے۔ابھیشیک نے کہاکہ اس سال دو زمروں میں نامزد ہونا میرے لیے بڑے اعزاز کی بات ہے۔ میں ہاکی انڈیا کے سپورٹ اسٹاف، ہمارے کوچز اور اپنے ساتھیوں کا شکریہ ادا کرنا چاہوں گا جنہوں نے مسلسل میرا ساتھ دیا اور ہمیشہ مجھے مشورہ دیا۔ میں ان کی تعریف کرتا ہوں۔ اس کی وجہ سے مجھے اعتماد حاصل ہوا اور میں آزادانہ طور پر کارکردگی دکھانے کے قابل ہو گیا۔ابھیشیک، جنہوں نے ایف آئی ایچ اوڈیشہ ہاکی مینز ہاکی ورلڈ کپ 2023 بھونیشور-رورکیلا میں چھ کھیلوں میں تین گول کیے، ہانگزو ایشین گیمز میں اپنی فارم کو جاری رکھا، جہاں انہوں نے سات میچوں میں نو گول کیے، جس سے ان کی ٹیم کو طلائی تمغہ جیتنے میں مدد ملی۔ انہیں گزشتہ ماہ رورکیلا میں ایف آئی ایچ مینز ہاکی پرو لیگ 2023/24 میں اسپین کے خلاف ہندوستان کی سنسنی خیز 2 – 2 (8 – 7 ایس او) سے جیت کے بعد پلیئر آف دی میچ بھی قرار دیا گیا۔ابھیشیک نے کہاکہ “یہ میرے لیے اچھا سال تھا۔ جب بھی میں ہندوستانی جرسی پہن کر میدان میں اترتا ہوں، میرا مقصد اس بات کو یقینی بنانا ہوتا ہے کہ میں اپنی بہترین کارکردگی پیش کروں تاکہ اپنی ٹیم کو مطلوبہ نتائج حاصل کرنے میں مدد مل سکے۔‘‘
