بھوپال:21؍نومبر:میں جانکی ہوں۔ یہ خود کفالت کی میری اپنی کہانی ہے۔ کبھی میرے پاس نئی زندگی شروع کرنے کے لیے محض 350 روپے تھے، لیکن خواب بڑے تھے اور ارادے مضبوط۔ سائیکل کا پنکچر بنانے سے لے کر خاتون کسان بننے تک میرا سفر جدوجہد سے بھرا رہا۔ آج میں نہ صرف معاشی طور پر خود کفیل ہوں، بلکہ اپنے گاؤں کی متعدد خواتین کو خود انحصاری کی راہ پر آگے بڑھانے میں بھی شریک ہوں۔ یہ کہانی صرف میری نہیں، بلکہ ان دیہی خواتین کی بھی ہے، جنہوں نے سماجی پابندیوں کو پیچھے چھوڑ کر اپنی محنت، اجتماعی طاقت اور خود اعتمادی سے تبدیلی کی نئی داستان رقم کی ہے۔شہڈول ضلع کے بشن پوروا گاؤں میں رہنے والی جانکی کی شادی محض 16 سال کی عمر میں ہو گئی تھی۔ اس وقت وہ آٹھویں جماعت تک تعلیم حاصل کر چکی تھیں۔ سسرال میں 12 افراد کا خاندان تھا۔ تھوڑی زمین تھی، لیکن آبپاشی کے وسائل نہ ہونے کی وجہ سے کھیتی پوری طرح بارش پر منحصر تھی۔ نامساعد حالات کے باوجود جانکی نے اپنی تعلیم جاری رکھی اور اوپن اسکول سے بارہویں جماعت کا امتحان پاس کیا۔ سال 2009 میں خاندان کی معاشی ضروریات پوری کرنے کے لیے انہوں نے سائیکل کا پنکچر بنانے کا کام بھی سیکھا۔
350 روپے اور جدوجہد سے نئی شروعات :
سال 2012 میں جانکی نے آجیویکا مشن کے خود امدادی گروپ سے جڑنے کا فیصلہ کیا۔ اس دور میں گاؤں میں پردے کی روایت اور سماجی پابندیوں کے باعث خواتین کا گھر سے باہر نکلنا اور معاشی فیصلے لینا آسان نہیں تھا۔ خاندان اور سماج کی مخالفت کے درمیان جانکی اور ان کے شوہر کو خاندان سے الگ ہونا پڑا۔ اس وقت ان کے پاس محض 350 روپے تھے۔ دونوں نے منریگا میں مزدوری کرکے اپنی نئی زندگی کا آغاز کیا۔ گروپ کے ذریعے تھوڑی تھوڑی بچت کرتے ہوئے جانکی نے خود کفالت کی جانب قدم بڑھائے۔سال 2017 میں جانکی کی زندگی میں بڑی تبدیلی آئی۔ خود امدادی گروپ کے ذریعے بینک سے قرض لے کر انہوں نے گھر میں آٹا چکی لگائی اور کریانہ کی دکان شروع کی۔ باقاعدہ آمدنی ہونے سے خاندان کی معاشی حالت بہتر ہوئی اور ان کا خود اعتمادی بھی بڑھا۔ اپنی کامیابی کو دوسری خواتین تک پہنچانے کے مقصد سے انہوں نے تین خود امدادی گروپوں کی تقریباً 80 خواتین کے بینک اکاؤنٹ کھلوائے۔