رائسین: 05؍اپریل :(پریس ریلیز)مدھیہ پردیش روڈ ڈیولپمنٹ کارپوریشن (ایم پی آر ڈی سی) بھوپال ڈویژن کے تحت رائے سین سے راحت گڑھ تک 81 کلو میٹر طویل اسٹیٹ ہائی وے-19 کو دو رویہ (ٹو لین) بنانے کا کام سست رفتاری کا شکار ہے، جس کی وجہ سے عوام کو شدید مشکلات کا سامنا کرنا پڑ رہا ہے۔ یہ تعمیراتی کام ایک نجی کمپنی کے سپرد ہے، مگر موجودہ حالات ایسے ہیں گویا سڑک کو کھود کر ادھورا ہی چھوڑ دیا گیا ہو۔
کئی مہینوں سے جگہ جگہ سڑک کی کھدائی کی جا چکی ہے، جس کے باعث گٹّی باہر آ گئی ہے۔ اس صورتحال میں خصوصاً دو پہیہ گاڑی چلانے والوں کے لیے سفر انتہائی خطرناک ہو گیا ہے۔ آئے دن درجنوں چھوٹے بڑے حادثات پیش آ رہے ہیں، جن میں بائیک سوار، خواتین اور بچے زخمی ہو رہے ہیں۔
سڑک کی خستہ حالی کے ساتھ ساتھ اڑتی ہوئی گرد و غبار نے بھی لوگوں کی زندگی اجیرن بنا دی ہے۔ دیہی اور قصبائی علاقوں کے مکین اور دکاندار مسلسل گرد کی زد میں ہیں۔ شہریوں کا کہنا ہے کہ اس دھول کے باعث سانس کی بیماریاں، خصوصاً دمہ، پھیلنے کا خدشہ بڑھ گیا ہے۔
اس منصوبے کے تحت رائے سین سے راحت گڑھ تِگڈّے تک سڑک اور پل و پلیوں کی تعمیر تقریباً 2 ارب 60 کروڑ روپے کی لاگت سے منظور کی گئی ہے۔ اس کام کی ذمہ داری ہریانہ کے گڑگاؤں میں واقع COMIT PPIL JV کمپنی کو دی گئی ہے۔ منصوبے کی مدت دو سال مقرر کی گئی تھی، لیکن ایک سال سے زائد عرصہ گزرنے کے باوجود صرف تقریباً 30 فیصد کام ہی مکمل ہو سکا ہے۔جہاں جہاں سڑک کھودی گئی ہے، وہاں آمد و رفت نہایت دشوار ہو گئی ہے۔ آنے والے برسات کے موسم کو لے کر بھی عوام میں تشویش پائی جا رہی ہے کہ اگر بروقت کام مکمل نہ ہوا تو صورتحال مزید سنگین ہو سکتی ہے۔اس اسٹیٹ ہائی وے-19 سے منسلک رائے سین، پٹھاری، امراوت ڈیم، نکترہ، نروَر، کھنڈیرا، سرسودا، بشن کھیڑا، کشن پور، دہگاؤں، مُڑیا کھیڑا، گڑھی، سہج پور، چاندونی گنج، بیناپور اور عالم پور سمیت متعدد دیہات کے باشندوں نے عوامی نمائندوں اور انتظامیہ سے فوری مداخلت کا مطالبہ کیا ہے۔
علاقہ کے لوگوں نے مرکزی وزیر و رکن پارلیمنٹ شیوراج سنگھ چوہان، علاقائی رکن اسمبلی ڈاکٹر پربھورام چوہدری، کلکٹر ارون کمار وشوکرما، سب ڈویژنل افسر انکیت جین اور ایم پی آر ڈی سی کے افسران سے اپیل کی ہے کہ تعمیراتی ایجنسی کے خلاف سخت کارروائی کرتے ہوئے کام میں تیزی لائی جائے۔ ساتھ ہی گرد و غبار پر قابو پانے کے لیے باقاعدہ پانی کا چھڑکاؤ کرایا جائے اور معیار کے ساتھ جلد از جلد سڑک کی تکمیل کو یقینی بنایا جائے۔شہریوں کا صاف کہنا ہے کہ اگر فوری طور پر مؤثر اقدامات نہ کیے گئے تو یہ سڑک عوام کے لیے سہولت کے بجائے ایک بڑی مصیبت بن سکتی ہے۔
اس سلسلے میں ایم پی آر ڈی سی کے ڈویژنل جنرل منیجر ایشور سِی چندیل سے موبائل نمبر 9425928289 پر رابطہ کرنے کی کوشش کی گئی، مگر انہوں نے فون کال وصول نہیں کی۔
