رایسین:یکم اپریل:(پریس ریلیز) ضلع رائےسین کی تحصیل غیرت گنج کے گرام پنچایت گڑھی میں واقع سرکاری ہائیر سیکنڈری اسکول، گڑھی میں نئے تعلیمی سیشن 2026-27 کا آغاز ‘داخلہ اُتسو’ اور ‘اسکول چلے ہم’ مہم کے تحت بڑے ہی جوش و خروش کے ساتھ کیا گیا۔تقریب کا آغاز اسکول احاطے میں ماتا سرسوتی کی پوجا اور وندنا کے ساتھ ہوا۔ اس موقع پر اسکول کے پرنسپل بھگوان سنگھ کھنگار، اساتذہ اور معزز شہریوں نے باقاعدہ پوجا کرکے پروگرام کا افتتاح کیا۔ حکومتی ہدایات کے مطابق وزیر اعلیٰ اور وزیر تعلیم کے خطاب کی براہِ راست نشریات بھی طلبہ کو دکھائی گئیں۔
اسکول میں داخل ہوتے ہی طلبہ و طالبات کا تلک لگا کر اور پھولوں کے گلدستے پیش کر کے پرتپاک استقبال کیا گیا، جس سے بچوں میں خاصا جوش دیکھنے کو ملا۔تقریب میں مہمانِ خصوصی کے طور پر گرام گڑھی کے سرپنچ سید مسعود علی پٹیل موجود رہے۔ جبکہ خصوصی مہمانوں میں بی جے پی لیڈر بھاگچند چورسیا، سابق جنپد ممبر کھیمچند چورسیا، سماجی کارکن موہن جاٹَو، ہندو اتسو سمیتی کے صدر روی چورسیا، رسیّدپور کے سرپنچ بھگوان سنگھ لودھی، راجکمار چورسیا اور گڈو پٹھان نے شرکت کی۔مہمانِ خصوصی نے اپنے خطاب میں طلبہ کو ترغیب دیتے ہوئے کہا: “تعلیم وہ واحد کنجی ہے جو آپ کے مستقبل کے بند دروازوں کو کھول سکتی ہے۔ آج کا دن صرف اسکول میں داخلے کا نہیں بلکہ اپنے خوابوں کو حقیقت میں بدلنے کی سمت ایک اہم قدم ہے۔”تقریب کے دوران نمایاں کارکردگی دکھانے والے طلبہ کو بھی اعزاز سے نوازا گیا۔ جماعت 11 ‘بی’ کے طالب علم ریحان منصوری اور جماعت 9 ‘بی’ کی طالبہ اجیوا خان کو اپنی اپنی جماعت میں سب سے زیادہ نمبر حاصل کرنے پر انعامات دیے گئے۔اس کے ساتھ ہی سرکاری منصوبوں کے تحت طلبہ میں مفت درسی کتب، سائیکلیں اور ترقی نامے (رزلٹ) بھی تقسیم کیے گئے۔اس موقع پر اسکول کے تمام اساتذہ، بڑی تعداد میں والدین اور طلبہ موجود رہے۔ تقریب کے اختتام پر پرنسپل بھگوان سنگھ کھنگار نے تمام مہمانوں اور حاضرین کا شکریہ ادا کیا۔
