بھوپال 6جون: وزیرِ اعلیٰ ڈاکٹر موہن یادو نے کہا ہے کہ مدھیہ پردیش تیزی سے بھارت کے نئے عالمی سرمایہ کاری اور برآمدی مرکز کے طور پر ابھر رہا ہے۔ ہمارا مدھیہ پردیش اب عالمی تجارتی دنیا میں بھی اپنی مضبوط شناخت کے ساتھ آگے بڑھ رہا ہے۔ انہوں نے کہا کہ بھارت اور لاطینی امریکہ و کیریبین ممالک کے درمیان بڑھتی ہوئی اقتصادی شراکت داری میں مدھیہ پردیش بھی اپنی مکمل صلاحیتوں کے ساتھ اہم کردار ادا کر رہا ہے۔ وزیرِ اعلیٰ ڈاکٹر یادو نے کہا کہ مدھیہ پردیش بے شمار مواقع کی سرزمین ہے۔ ریاست کی مستحکم اور شفاف پالیسیاں سرمایہ کاری اور صنعت دوست ہیں۔ آئی ٹی و الیکٹرانکس، قابلِ تجدید توانائی، آٹوموبائل، فارما انڈسٹری، فوڈ پروسیسنگ، ٹیکسٹائل، دفاعی شعبہ اور ٹیکنالوجی کے میدان میں ہم تیزی سے ترقی کر رہے ہیں۔ ہمارے پاس 1.25 لاکھ ایکڑ سے زائد ریڈی ٹو یوز لینڈ بینک دستیاب ہے۔ آج مدھیہ پردیش لاجسٹکس اور رابطہ کاری کا سب سے بڑا مرکز بن چکا ہے۔ ریاست میں 5 لاکھ کلومیٹر سے زائد مضبوط سڑک نیٹ ورک اور جدید ریل و فضائی رابطوں نے آمدورفت کو آسان بنا دیا ہے۔ اگلے 5 برسوں میں ہم 6 بڑے صنعتی کوریڈور تیار کریں گے، جو مالوا سے بندیل کھنڈ اور نیماڑسے وندھیہ تک سڑک رابطوں کو مزید مضبوط بنائیں گے۔ وزیرِ اعلیٰ ڈاکٹر یادو نے لاطینی امریکی اور کیریبین ممالک کے تجارتی نمائندوں کو مدھیہ پردیش میں سرمایہ کاری، پیداوار اور اختراع کے لیے مدعو کرتے ہوئے کہا کہ ہم آپ کے ساتھ مضبوط اور طویل مدتی شراکت داری کے لیے تیار ہیں۔ انہوں نے کہا کہ مدھیہ پردیش ملک کے وسط میں واقع ہونے کی وجہ سے تجارت و کاروبار کے لیے سب سے موزوں مقام ہے۔ ریاست میں امن و قانون کی کوئی مشکل نہیں ہے۔ یہاں صنعتی طور پر تربیت یافتہ مزدوروں کی کمی نہیں ہے۔ مدھیہ پردیش سب کو اپنانے والی ریاست ہے، جو ایک بار یہاں آتا ہے، یہیں کا ہو کر رہ جاتا ہے۔ مدھیہ پردیش میں کھلے دل سے سرمایہ کاری کریں، یہاں سرمایہ کاری بڑا منافع بخش سودا ہے۔ وزیرِ اعلیٰ ڈاکٹر یادو ہفتہ کے روز اندور میں منعقدہ بھارت-لاطینی امریکہ و کیریبین تجارت و سرمایہ کاری فورم-2026 کے افتتاحی اجلاس سے خطاب کر رہے تھے۔ انہوں نے چراغ روشن کرکے فورم کے افتتاحی اجلاس کا باقاعدہ آغاز کیا۔
و
زیرِ اعلیٰ ڈاکٹر یادو نے بھارت-لاطینی امریکہ و کیریبین تجارت و سرمایہ کاری فورم-2026 کے لیے خصوصی طور پر تیار کردہ ڈیجیٹل پلیٹ فارم اور ویب سائٹ کا ریموٹ کے ذریعے افتتاح کیا۔انہوں نے ان ممالک کی مشترکہ تجارت و کاروبار پر مبنی خصوصی میگزین “دی بزنس ٹائیکونز” کا بھی اجراء کیا۔ وزیرِ اعلیٰ ڈاکٹر یادو نے کہا کہ مالی سال 2025-26 میں مدھیہ پردیش کی لاطینی امریکہ اور کیریبین ممالک کو برآمدات بڑھ کر 3 ہزار 835 کروڑ روپے تک پہنچ گئی ہیں، جو گزشتہ سال کے مقابلے میں 19 فیصد نمایاں اضافہ ظاہر کرتی ہیں۔ اس کامیابی میں فارماسیوٹیکل شعبے کا خصوصی کردار رہا ہے۔ انہوں نے کہا کہ فارماسیوٹیکلز، انجینئرنگ مصنوعات، پلاسٹک مصنوعات اور جمبو بیگز، زرعی مصنوعات اور مینوفیکچرنگ سیکٹر ریاستی برآمدی صلاحیت کے اہم ستون بن کر ابھرے ہیں۔ برازیل، میکسیکو، چلی، ڈومینیکن ریپبلک، ارجنٹینا، پیرو اور کولمبیا جیسے ممالک کے ساتھ مدھیہ پردیش کی تجارتی سرگرمیاں مسلسل نئی بلندیوں کو چھو رہی ہیں۔ وزیرِ اعلیٰ نے کہا کہ یہ اعداد و شمار لاطینی امریکی اور کیریبین ممالک میں “میڈ اِن انڈیا” کے ساتھ “میڈ اِن ایم پی” مصنوعات کو ملنے والے اعتماد، قبولیت اور بڑھتی ہوئی عالمی مقبولیت کا واضح ثبوت ہیں۔
