کولکاتا:21جولائی:کولکاتا ہائی کورٹ نے مبینہ زیادتی کے ایک مقدمے میں آئی پی ایل کرکٹر ابھیشیک پوریل کی گرفتاری کا حکم جاری کیا ہے۔ عدالت نے پولیس کو ہدایت دی ہے کہ ابھیشیک کے تمام الیکٹرانک آلات ضبط کیے جائیں تاکہ مبینہ نجی تصاویر اور ویڈیوز شیئر نہ کی جا سکیں۔بنگال کے کرکٹر ابھیشیک پوریل پر ایک خاتون نے الزام لگایا ہے کہ انہوں نے شادی کا وعدہ کرکے اس سے جسمانی تعلق قائم کیا، دونوں کے نجی لمحات کی ویڈیو ریکارڈ کی، اور بعد میں اسے دھمکیاں بھی دیں۔
23 سالہ ابھیشیک پوریل وکٹ کیپر بلے باز ہیں۔ وہ بنگال کی جانب سے 116 اور آئی پی ایل ٹیم دہلی کیپیٹلز کی جانب سے 35 میچ کھیل چکے ہیں۔ دہلی کیپیٹلز نے انہیں 4 کروڑ روپے میں ریٹین کیا تھا۔ آئی پی ایل 2026 میں انہوں نے 4 میچوں میں 108 رنز بنائے تھے۔
شکایت کے مطابق ابھیشیک پوریل کی خاتون سے جنوری 2023 میں جان پہچان ہوئی تھی۔ خاتون کا کہنا ہے کہ پوریل اسے منکنڈو میں واقع اپنے فلیٹ پر لے گیا، شادی کا یقین دلایا اور اسی بنیاد پر جسمانی تعلق قائم کیا۔ بعد میں اسے معلوم ہوا کہ ملزم کے دیگر خواتین سے بھی تعلقات تھے۔
خاتون نے مزید الزام لگایا کہ ابھیشیک نے اسے غیر قانونی طور پر روک کر رکھا، کھانا نہیں دیا اور اسے دوسروں سے الگ تھلگ رکھا۔ شکایت کے مطابق 2 اپریل 2026 کو دہلی میں پیش آنے والے مبینہ واقعے کے بعد اس کی جسمانی حالت خراب ہوگئی تھی اور اسے فوری طبی علاج کرانا پڑا۔ خاتون نے یہ بھی الزام لگایا کہ اسے فون اور سوشل میڈیا کے ذریعے مسلسل دھمکیاں دی جا رہی ہیں۔
نوٹ: یہ الزامات شکایت کنندہ کی جانب سے لگائے گئے ہیں۔ مقدمہ زیرِ سماعت ہے اور عدالت کی جانب سے ابھی ان الزامات پر حتمی فیصلہ نہیں دیا گیا ہے۔
