لندن، 28 جون (یواین آئی ) کپتان ہرمن پریت کور کی جارحانہ نصف سنچری کی بدولت ہندوستان نے اتوار کو خواتین کے ٹی-20 ورلڈ کپ کے گروپ اے کے نہایت اہم “کرو یا مرو” مقابلے میں آسٹریلیا کے خلاف مقررہ 20 اوورز میں چار وکٹوں کے نقصان پر 170 رنز کا مضبوط اسکور کھڑا کر دیا۔ٹاس جیت کر پہلے بیٹنگ کا فیصلہ کرنے والی ہندوستانی ٹیم کے ٹاپ آرڈر کے چاروں بلے بازوں نے عمدہ شراکت کی، تاہم اننگز کے آخری اوورز میں ہرمن پریت کور کی دھواں دار بیٹنگ نے ٹیم کے مجموعے کو مضبوط بنیاد فراہم کی۔
ہندوستان نے آخری پانچ اوورز میں 59 جبکہ آخری دو اوورز میں 36 رنز اسکور کیے۔ ہرمن پریت کور نے 27 گیندوں پر 56 رنز کی برق رفتار اننگز کھیلی، جس میں چھ چوکے اور تین شاندار چھکے شامل تھے۔ انہوں نے آسٹریلوی کپتان کے ایک اوور میں مسلسل تین چھکے لگا کر میچ کا رخ ہندوستان کے حق میں موڑ دیا۔اوپنر اسمرتی مندھانا نے 38 جبکہ شیفالی ورما نے 34 رنز بنائے۔ جیمیما روڈریگز نے بھی 34 رنز کی اننگز کھیلی، اگرچہ وہ پوری طرح روانی حاصل نہیں کر سکیں۔میچ کے آخری لمحات میں آسٹریلیا کی فیلڈنگ بھی دباؤ کا شکار نظر آئی اور چند اہم کیچز ضائع کیے، جس کا بھرپور فائدہ ہندوستانی کپتان نے اٹھایا۔
