بھوپال27جون:وزیر اعلیٰ ڈاکٹر موہن یادو نے کہا ہے کہ چھوٹی صنعتوں کے فروغ میں مدھیہ پردیش ملک میں سب سے آگے ہے۔ وزیر اعظم مسٹر نریندر مودی ایم ایس ایم ای شعبے میں بھارت کو عالمی چیمپئن بنا رہے ہیں۔ صنعت اور کاروبار کا شعبہ دوسروں کی زندگی کو بہتر اور خوشحال بناتا ہے۔ صنعت کار اپنے کام کو عبادت اور محنت کو ریاضت سمجھتے ہیں۔ آنے والے وقت میں صنعتی شعبے کا کردار مزید اہم ہوگا اور خوشحالی کا سورج طلوع ہوگا۔ وزیر اعلیٰ ڈاکٹر یادو نے کہا کہ آئندہ سال 2027 میں بھوپال میں گلوبل انویسٹرز سمٹ کا انعقاد کیا جائے گا۔ اس سمٹ میں وزیر اعظم مسٹر نریندر مودی کو مدعو کرنے کا فیصلہ کیا گیا ہے۔ وزیر اعلیٰ ڈاکٹر یادو ہفتہ کے روز رویندر بھون میں عالمی ایم ایس ایم ای دن کے موقع پر منعقدہ “بااختیار صنعت کار: خوشحال مدھیہ پردیش” سمٹ سے خطاب کر رہے تھے۔ اس موقع پر انہوں نے صنعت کاروں کی جانب سے پیش کی گئی مختلف مصنوعات، فنون اور دستکاری کی وسیع نمائش کا بھی مشاہدہ کیا۔ یہ نمائش اتوار، 28 جون کو بھی عام لوگوں کے لیے کھلی رہے گی۔ حکومت کی جانب سے کپاس پر منڈی فیس نصف کرنے سمیت صنعت کاروں اور کسانوں کے مفاد میں کیے گئے متعدد فیصلوں پر برہان پور سمیت مختلف اضلاع کے نمائندوں نے وزیر اعلیٰ ڈاکٹر یادو کا خیر مقدم کیا۔ سمٹ میں تقریباً 2000 صنعت کاروں، سرمایہ کاروں، خود امدادی گروپوں کے اراکین اور پالیسی سازوں نے شرکت کی۔
وزیر اعلیٰ ڈاکٹر یادو نے کہا کہ ملک میں تقریباً 7 کروڑ ایم ایس ایم ای یونٹس موجود ہیں، جن میں سے 25 لاکھ مدھیہ پردیش میں ہیں۔ ریاست کی یہ یونٹس تقریباً ڈیڑھ کروڑ افراد کو روزگار فراہم کر رہی ہیں۔ مجموعی گھریلو پیداوار (جی ڈی پی) میں ایم ایس ایم ای شعبے کا حصہ 31 فیصد ہے، جبکہ برآمدات میں اس کا حصہ 49 فیصد اور مینوفیکچرنگ پیداوار میں 35 فیصد ہے۔ اس طرح ایم ایس ایم ای شعبہ معیشت کے انجن کے طور پر کام کر رہا ہے۔ مدھیہ پردیش کا ایم ایس ایم ای شعبہ عوامی فلاح و بہبود کا ایک مؤثر ذریعہ ہے۔ وزیر اعلیٰ ڈاکٹر یادو نے پروگرام کے دوران ریموٹ کے ذریعے ایم ایس ایم ای یونٹس کے ساتھ ساتھ بڑے صنعتی اداروں کے لیے بھی مالی امداد جاری کی۔ ایم ایس ایم ای یونٹس کو 225 کروڑ 19 لاکھ روپے اور مختلف اسٹارٹ اپس کو تقریباً 39 لاکھ روپے فراہم کیے گئے۔ بڑے صنعتی اداروں کو سرمایہ کاری ترغیبی اسکیم کے تحت 1274 کروڑ روپے منتقل کیے گئے۔ اس طرح مجموعی طور پر صنعتی شعبے کو 1500 کروڑ روپے فراہم کیے گئے۔ مدھیہ پردیش ملک کی واحد ریاست ہے جہاں مئی 2026 تک کی تمام واجبات صنعت کاروں کو سرمایہ کاری امداد کی صورت میں ادا کیے جا چکے ہیں۔
