رائسین:09؍مئی: (پریس ریلیز) ضلع کی غیرت گنج تحصیل میں واقع شری ناتھ ویئر ہاؤس میں امدادی قیمت پر گیہوں خریدی کو لے کر مسلسل موصول ہو رہی شکایات کے بعد ایس ڈی ایم نے موقع پر پہنچ کر جانچ کی۔ معائنہ کے دوران ویئر ہاؤس میں کئی بے ضابطگیاں سامنے آئیں، جس پر انتظامیہ نے ناراضگی ظاہر کی۔
معلومات کے مطابق، معیار سے متعلق شکایات کے سبب سروئیر کی جانب سے پہلے ہی ویئر ہاؤس میں گیہوں کی تولائی پر روک لگانے کی بات کہی گئی تھی۔ اس کے باوجود ویئر ہاؤس آپریٹر کی جانب سے بغیر اجازت تولائی کا عمل جاری رکھا گیا۔ ایس ڈی ایم نے موقع پر پہنچ کر تولائی کے عمل، گیہوں کے معیار اور ریکارڈ کی جانچ کی۔
معائنہ کے دوران انتظامی افسران نے پایا کہ مقررہ قواعد و ضوابط پر عمل نہیں کیا جا رہا تھا۔ بتایا جا رہا ہے کہ خراب معیار کے گیہوں کی تولائی کیے جانے کی شکایات کسانوں اور متعلقہ ملازمین کی جانب سے بھی کی گئی تھیں۔ معاملے کو سنجیدگی سے لیتے ہوئے ایس ڈی ایم نے آپریٹر کو سخت پھٹکار لگائی اور ضروری دستاویزات کی جانچ کے احکامات دیے۔
ایس ڈی ایم نے کہا کہ حکومت کی ہدایات کے خلاف کسی بھی قسم کی لاپروائی یا من مانی برداشت نہیں کی جائے گی۔ اگر جانچ میں بے ضابطگیاں ثابت ہوتی ہیں تو متعلقہ افراد کے خلاف سخت کارروائی کی جائے گی۔
ادھر، معائنہ کی اطلاع ملتے ہی ویئر ہاؤس احاطے میں کسانوں اور ملازمین کی بھیڑ جمع ہو گئی۔ کسانوں نے انتظامیہ سے خریدی کے نظام کو شفاف بنانے اور قصورواروں کے خلاف کارروائی کا مطالبہ کیا ہے۔
