بھوپال، 24 اکتوبر:۔ محکمہ اعلیٰ تعلیم اور مدھیہ پردیش ہندی گرنتھ اکادمی کے مشترکہ اہتمام میں ہندوستانی علمی روایت پر مبنی کتابوں کی تصنیف کے لیے سروجنی نائیڈو سرکاری گرلز پوسٹ گریجویٹ خود مختار کالج، بھوپال میں 2 روزہ ورکشاپ کا آغاز ہوا۔ اس ورکشاپ کا مقصد اعلیٰ تعلیم کے لیے معیاری، اصل اور مستند نصابی مواد تیار کرنے کے ساتھ ہندوستانی علمی روایت کو نصاب میں منظم طریقے سے شامل کرنا ہے۔ورکشاپ میں کمشنر اعلیٰ تعلیم پرَبل سپاہا، مدھیہ پردیش ہندی گرنتھ اکادمی کے ڈائریکٹر ڈاکٹر اشوک کڈیل، شکشا سنسکرتی اتھان نیاس کے قومی سکریٹری ڈاکٹر اتل کوٹھاری، ماہر تعلیم ڈاکٹر چاند کرن سلوجا اور ہریانہ کے والمیکی سنسکرت یونیورسٹی کے سابق وائس چانسلر ڈاکٹر رمیش چندر بھاردواج سمیت مختلف شعبوں کے ماہرین نے شرکت کی۔
کمشنر اعلیٰ تعلیم پرَبل سپاہا نے کہا کہ تحقیقی مواد کی تصدیق کرنے کے بعد ہی اسے نصاب میں شامل کیا جانا چاہیے۔ ورکشاپ میں ہندوستانی علمی روایت کی بنیادی اساس اور مستند ذرائع کا جائزہ لینے کے ساتھ مختلف فیکلٹیز اور مضامین کی ضروریات کے مطابق کتابوں کی تصنیف کے لائحہ عمل پر تبادلہ خیال کیا گیا۔محکمہ اعلیٰ تعلیم کے خصوصی ڈیوٹی افسر دنیش دوے نے بتایا کہ ورکشاپ کے آئندہ اجلاسوں میں مختلف فیکلٹیز اور مضامین کے حوالے سے ہندوستانی علمی روایت پر تفصیلی گفتگو کی جائے گی۔ موضوع کے ماہرین کی رہنمائی میں مستند مواد کے انتخاب، موضوعات کی منصوبہ بندی، زبان و اسلوب، سوالات، سرگرمیوں اور مشقوں کی نوعیت پر تبادلہ خیال کیا جائے گا۔ آخری اجلاس میں مختلف فیکلٹیز کے لحاظ سے گروپ ڈسکشن کے ذریعے کتابوں کی تصنیف کے عمل کو آگے بڑھایا جائے گا۔
