رائے پور، 26 مارچ (یو این آئی): کرناٹک کے تیراک منیکانت ایل نے شاندار کارکردگی کا مظاہرہ کرتے ہوئے اکیلے دم پر اپنی ٹیم کو میڈل ٹیبل میں سرفہرست رکھا۔ انہوں نے جمعرات کو تین مزید طلائی تمغے جیت کر اپنے کل سونے کے تمغوں کی تعداد پانچ کر لی، جبکہ اوڈیشہ کی انجلی منڈا نے تیراکی کے مقابلوں میں گولڈ میڈلز کی ہیٹ ٹرک مکمل کی۔میزبان چھتیس گڑھ کے لیے بھی خوشی کا موقع رہا، جہاں مقامی تیراک انوشکا بھگت نے خواتین کے 200 میٹر مقابلے میں چاندی کا تمغہ جیت کر اپنے کل تمغوں کی تعداد دو کر لی۔ اس سے قبل انہوں نے 100 میٹر بریسٹ اسٹروک میں بھی چاندی کا تمغہ جیتا تھا۔دوسرے دن کے اختتام تک کرناٹک آٹھ سونے، تین چاندی اور ایک کانسہ کے تمغے کے ساتھ پہلے نمبر پر رہا، جبکہ اوڈیشہ پانچ سونے، ایک چاندی اور آٹھ کانسہ کے تمغوں کے ساتھ دوسرے مقام پر ہے۔ آسام پانچ تمغوں (دو سونے) کے ساتھ تیسرے، جبکہ چھتیس گڑھ تین تمغوں کے ساتھ چھٹے نمبر پر ہے۔تیراکی میں منیکانت سب سے بڑے اسٹار بن کر ابھرے ہیں۔ بدھ کو دو تمغے جیتنے کے بعد، انہوں نے جمعرات کا آغاز 200 میٹر انفرادی میڈلے (2:25.93 سیکنڈ) میں جیت کے ساتھ کیا۔ اس کے بعد انہوں نے 100 میٹر بیک اسٹروک فائنل جیتا اور پھر 4×100 میٹر ریلے میں کرناٹک کی ٹیم کے لیے آخری مرحلہ تیر کر اپنا پانچواں طلائی تمغہ یقینی بنایا۔ منیکانت نے کہا، “میں کل نو مقابلوں میں حصہ لے رہا ہوں اور تمام میں سونا جیتنے کا ہدف ہے۔خواتین کی تیراکی میں اوڈیشہ نے تینوں سونے کے تمغے جیتے، جن میں سے دو انجلی منڈا کے نام رہے۔ انہوں نے 200 میٹر انفرادی میڈلے اور 100 میٹر بیک اسٹروک (1:19.98 سیکنڈ) میں کامیابی حاصل کی۔ 4×100 میٹر ریلے میں بھی اوڈیشہ کی ٹیم (ریتیکا منج، کرشنا نائیک، روپالی ہیمبرم اور سبھاسمیت بائی پائی) نے گجرات اور کرناٹک کو ہرا کر سونا جیتا۔
