چنئی، 06 فروری (یو این آئی) آئی سی سی مردوں کا ٹی-20 ورلڈ کپ 2026 کل شام ممبئی کے تاریخی وانکھیڑے اسٹیڈیم میں ایک پرجوش افتتاحی تقریب کے ساتھ شروع ہوگا۔ یہ تقریب میزبان ہندوستان اور امریکہ کے درمیان ہونے والے افتتاحی میچ سے قبل ٹورنامنٹ کا جوش و خروش بڑھانے کے لیے منعقد کی جا رہی ہے۔
شام 6 بجے شروع ہونے والی اس تقریب میں پورے اسٹیڈیم کو ایک اسٹیج میں تبدیل کر دیا جائے گا، جہاں لائیو میوزک اور بڑے پیمانے پر کوریوگرافی کے مظاہرے ہوں گے۔ اس کے بعد ٹی-20 ورلڈ کپ کی ٹرافی کی نمائش کی جائے گی۔
آئی سی سی کی جانب سے جاری کردہ تفصیلات کے مطابق، شو کا آغاز رشبھ شرما اور شیومنی کی شاندار موسیقی سے ہوگا، جس کے بعد ایک ‘جیٹ پیک’ پرفارمر ٹرافی لے کر اسٹیڈیم میں داخل ہوگا،یہ لمحہ شائقین کو مسحور کرنے کے لیے تیار کیا گیا ہے۔
ٹورنامنٹ کی ٹرافی کا استقبال آئی سی سی چیئرمین جے شاہ اور سابق ہندوستانی کپتان روہت شرما کریں گے، جنہوں نے 2024 میں ہندوستان کو عالمی چیمپئن بنایا تھا۔ وہ ٹورنامنٹ میں شرکت کرنے والے تمام 20 ممالک کی نمائندگی کرنے والے 20 بچوں کے ساتھ باقاعدہ طور پر ٹی-20 ورلڈ کپ 2026 کے آغاز کا اعلان کریں گے۔ٹرافی کی آمد کے بعد مشہور گلوکار بادشاہ اپنی لائیو پرفارمنس سے شائقین کو لطف اندوز کریں گے، جبکہ نورا فتحی رقاصوں کے ایک بڑے گروپ کے ساتھ اپنے فن کا مظاہرہ کریں گی۔ تقریب کا اختتام دونوں فنکاروں کے گرینڈ فائنلے کے ساتھ ہوگا۔
اس تقریب کو ٹی-20 کرکٹ کی رفتار اور توانائی کی عکاسی کے لیے ڈیزائن کیا گیا ہے، جہاں گراؤنڈ کو ایک بصری کینوس کے طور پر استعمال کیا جائے گا۔ شو کا اختتام آتش بازی کے شاندار مظاہرے کے ساتھ ہوگا، جس کے فوراً بعد شام 7 بجے ہندوستان بمقابلہ امریکہ میچ شروع ہوگا۔
صرف میچ کی ٹکٹ رکھنے والے شائقین ہی افتتاحی تقریب دیکھ سکیں گے، اور شائقین کو مشورہ دیا گیا ہے کہ وہ وقت سے پہلے اسٹیڈیم پہنچ جائیں۔
