بھوپال، 19 فروری (رپورٹر) مدھیہ پردیش میں گرمی کی شدت میں اضافہ ہوتا جا رہا ہے۔ دن اور رات کے درجہ حرارت میں روز بروز اضافہ ہو رہا ہے۔ گزشتہ 24 گھنٹوں کے دوران زیادہ سے زیادہ درجہ حرارت میں چار ڈگری اور کم سے کم درجہ حرارت میں 5.5 ڈگری کا اضافہ ہوا ہے۔ ریاست کے 19 اضلاع میں دن کا درجہ حرارت 32 ڈگری اور 25 اضلاع میں رات کا درجہ حرارت 15 ڈگری سے تجاوز کر گیا ہے۔دتیا میں سب سے کم درجہ حرارت 10 ڈگری ریکارڈ کیا گیا۔ شیو پوری میں زیادہ سے زیادہ درجہ حرارت 26.2 ڈگری رہا۔ محکمہ موسمیات کے مطابق، گوالیار-چمبل ڈویژن کے شمالی حصے میں 22 فروری یعنی اگلے چار دنوں تک موسم تبدیل رہے گا۔ یہاں گرج چمک کے ساتھ ہلکی بارش ہو سکتی ہے۔
ماہرین موسمیات کے مطابق شمالی ہندوستان میں ویسٹرن ڈسٹربنس سرگرم ہوگیا ہے۔ گردابی ہواؤں کا گھیرا بھی ہے۔ اس کے ساتھ ہی بحیرہ عرب سے جنوب مغربی ہواؤں کے ساتھ نمی ریاست میں آ رہی ہے۔ نیز، شمالی اور وسطی ہندوستان کے اوپری ٹروپاسفیئر میں 250 کلومیٹر فی گھنٹہ کی رفتار سے چلنے والی جیٹ اسٹریم ہواؤں کی وجہ سے، ایم پی میں درجہ حرارت میں کمی ہو سکتی ہے۔پیر کو شیوپور کلاں، مرینا اور بھنڈ میں مطلع ابر آلود رہا۔ گرج چمک کی صورتحال برقرار رہے گی۔
منگل کو گوالیار-چمبل ڈویژن میں بعض مقامات پر بوندا باندی اور بعض مقامات پر بادل چھائے رہیں گے۔ 21 اور 22 فروری کو گوالیار، بھنڈ، شیوپور کلاں، شیو پوری، مرینا اور دتیا میں گرج چمک کی صورت حال رہے گی۔
