جے پور،31 دسمبر (یو این آئی ) وجے ہزارے ٹرافی کے ایلیٹ گروپ سی میں آج ممبئی کی بلے بازی نے وہ قہر ڈھایا جس کی مثال تاریخ میں کم ہی ملتی ہے۔ سرفراز خان کی تباہ کن سنچری، مشیر خان اور ہاردک تامورے کی برق رفتار نصف سنچریوں کی بدولت ممبئی نے گوا کے خلاف 8 وکٹوں پر 444 رنز کا ایسا اسکور کھڑا کر دیا جس نے حریف ٹیم کے ہوش اڑا دیے۔جب سرفراز خان کریز پر آئے تو گوا کے بولرز کو اندازہ نہیں تھا کہ ان کے ساتھ کیا ہونے والا ہے۔ سرفراز نے گراؤنڈ کو کسی ویڈیو گیم کی طرح استعمال کیا اور محض 56 گیندوں پر اپنی سنچری مکمل کی۔ جب وہ آؤٹ ہوئے تو ان کا اسکور 75 گیندوں پر 157 رنز تھا، جس میں ریکارڈ ساز 14 فلک بوس چھکے اور 9 چوکے شامل تھے۔ ان کی بلے بازی نے اسٹیڈیم میں موجود شائقین کو سحر زدہ کر دیا۔میچ کی خاص بات سرفراز اور ان کے بھائی مشیر خان کے درمیان ہونے والی 93 رنز کی شراکت تھی۔ مشیر خان نے بھی اپنی کلاس دکھائی اور 66 گیندوں پر 60 رنز کی ذمہ دارانہ اننگز کھیلی۔ اس سے قبل یشسوی جیسوال نے بیماری کے بعد واپسی کرتے ہوئے 46 رنز بنا کر اننگز کو استحکام فراہم کیا۔
اننگز کے آخری لمحات میں ہاردک تامورے نے صرف 28 گیندوں پر 53 رنز کی اننگز کھیل کر گوا کی رہی سہی کسر نکال دی۔ کپتان شاردول ٹھاکر (27) اور تنش کوٹیان (23 ناٹ آؤٹ) نے بھی رنز کی بہتی گنگا میں ہاتھ دھوئے اور مجموعی اسکور کو 444 تک پہنچا دیا۔
گوا کے کپتان درشن مسال نے 3 وکٹیں تو حاصل کیں، مگر ان کا اسکور کارڈ ممبئی کے بلے بازوں کی بے رحمی کی گواہی دے رہا تھا۔ واسوکی کوشک اور للت یادو نے دو دو وکٹیں لیں، مگر وہ رنز کا سیلاب روکنے میں مکمل طور پر ناکام رہے۔
445 رنز کے ناممکن ہدف کے تعاقب میں گوا کی ٹیم نے ہمت نہ ہاری اور مقررہ اوورز میں 9 وکٹوں پر 357 رنز بنائے۔
ابھینو نے شاندار بلے بازی کرتے ہوئے 70 گیندوں پر 100 رنز بنائے، جس میں 8 فلک بوس چھکے شامل تھے۔
للت یادو (64) اور ابھینو کے درمیان پانچویں وکٹ کے لیے 113 رنز کی شراکت ہوئی، مگر رنز کا ہدف اتنا بڑا تھا کہ گوا کی ٹیم منزل تک نہ پہنچ سکی۔کپتان شاردول ٹھاکر نے بہترین بولنگ کرتے ہوئے 3 کھلاڑیوں کو آؤٹ کیا۔ حیرت انگیز طور پر یشسوی جیسوال نے بھی اپنی اسپن کا جادو دکھایا اور 2 اہم وکٹیں حاصل کیں، جبکہ تشار دیشپانڈے، مشیر خان اور سلویسٹر ڈیسوزا نے ایک ایک شکار کیا۔
