ممبئی، 20 مئی (یواین آئی) انڈین پریمیئر لیگ (آئی پی ایل) 2025 کے 63ویں مقابلے میں بدھ کو ممبئی انڈینز اور دہلی کیپٹلزکے درمیان ٹورنامنٹ کے آخری پلے آف میں جگہ بنانے کے لیے زبردست ٹکر ہوگی۔ دہلی کیپٹلزاس وقت 12 میچوں میں 13 پوائنٹس کے ساتھ پوائنٹس ٹیبل میں پانچویں نمبر پر ہے، جبکہ اس کا نیٹ رن ریٹ( 0.260-) ہے، جس کی وجہ سے اس کی پلے آف تک رسائی مشکل ہو گئی ہے۔ دہلی کو پلے آف میں پہنچنے کے لیے یہ میچ ہر حال میں جیتنا ہوگا۔ دوسری جانب 12 میچوں میں 14 پوائنٹس کے ساتھ چوتھے نمبر پر موجود سابق چیمپیئن ممبئی، گھریلو میدان پر دہلی کو شکست دے کر پلے آف میں پہنچنا چاہے گی۔ہاردک پانڈیا کی قیادت میں ممبئی نے اپنی فارم حاصل کر لی ہے۔ اب تک اس نے سات میچ جیتے ہیں اور ٹیم بیٹنگ، بولنگ اور فیلڈنگ تینوں شعبوں میں متوازن نظر آ رہی ہے۔ ممبئی کے لیے سوریا کمار یادو نے 12 میچوں میں 180 سے زائد کے اسٹرائیک ریٹ کے ساتھ 510 رنز بنا کر شاندار کارکردگی دکھائی ہے۔ روہت شرما، ریان رکلٹن اور ول جیکس بھی عمدہ فارم میں ہیں۔ تلک ورما اور نمن دھیر نے مڈل آرڈر میں اہم رنز اسکور کیے ہیں۔ اگر بولنگ کی بات کی جائے تو جسپریت بمراہ اور ٹرینٹ بولٹ نے پاور پلے اور ڈیتھ اوورز میں اہم وکٹیں حاصل کی ہیں، جبکہ پانڈیا نے 9 سے کچھ زائد کی اکانومی کے ساتھ 13 وکٹیں لی ہیں۔ دیپک چاہر اور کرن شرما بھی بہترین متبادل گیندباز ثابت ہوئے ہیں۔دہلی کی جانب سے گزشتہ میچ میں کے ایل راہل نے ناٹ آوٹ 112 رنز کی اننگز کھیلی، لیکن ان کی سنچری جتوانے میں ناکام رہی۔ انہوں نے 11 اننگز میں 60 سے زائد کی اوسط سے 493 رنز بنائے ہیں۔ دوسرے اوپنر ابھشیک پوریل نے بھی اب تک 295 رنز بنائے ہیں۔ دہلی کے مڈل آرڈر میں اکشر پٹیل، ٹرِسٹن سٹَبز اور آشتوش شرما شامل ہیں، لیکن ان کے کھیل میں مستقل مزاجی کی کمی نے ٹیم کو قریبی میچز میں نقصان پہنچایا ہے۔
مچل اسٹارک کے ٹورنامنٹ سے باہر ہونے کے بعد دہلی کی امیدیں مستفیض الرحمٰن اور دُشمنتھا چمیرا پر ہوں گی۔ کلدیپ یادو نے 7 سے کم اکانومی کے ساتھ 12 وکٹیں لے کر شاندار کارکردگی دکھائی ہے، جبکہ اکشر کا آل راؤنڈ مظاہرہ بھی اہم ہے۔
وانکھیڑے اسٹیڈیم کی پچ پر اس سیزن میں اس میدان پر پہلی اننگز کا اوسط اسکور تقریباً 190 رہا ہے، اور کھیلے گئے 6 میچوں میں سے 4 میں ہدف کامیابی سے حاصل کیا گیا ہے۔
