بنگلورو، 16 مئی (یواین آئی) انڈین پریمیئر لیگ (آئی پی ایل) میں ہفتے کو ایم چناسوامی اسٹیڈیم میں ہونے والے میچ میں رائل چیلنجرز بنگلور (آر سی بی) پلے آف میں جگہ یقینی بنانے اترے گی، جبکہ کولکاتا نائٹ رائیڈرز (کے کے آر) کے لیے یہ میچ جیتنا لازمی ہوگا تاکہ وہ ٹورنامنٹ میں برقرار رہ سکے۔پاکستان کے ساتھ کشیدگی کی وجہ سے ایک ہفتے کے لیے ملتوی ہوئے آئی پی ایل میں وقفے کے بعد آر سی بی کے لیے اچھی خبر یہ ہے کہ ٹیم میں لنگی انگیدی، ماینک اگروال، بھونیشور کمار اور سوپنل سنگھ جیسے تجربہ کار کھلاڑیوں کی واپسی ہوئی ہے۔آر سی بی نے اپنے پچھلے پانچ میں سے چار میچ جیتے ہیں اور 11 میچز میں 16 پوائنٹس کے ساتھ پوائنٹس ٹیبل پر دوسرے نمبر پر ہے، انہیں پلے آف میں پہنچنے کے لیے صرف ایک اور جیت درکار ہے۔دوسری طرف، کے کے آر کے 12 میچز میں 11 پوائنٹس ہیں اور اسے پلے آف میں جانے کے لیے اپنے باقی دونوں میچز بڑے فرق سے جیتنے ہوں گے اور دوسرے نتائج پر بھی انحصار کرنا ہوگا۔وراٹ کوہلی آر سی بی کے لیے اہم کردار ادا کر رہے ہیں، انہوں نے اس سیزن میں 505 رنز بنائے ہیں اور کے کے آر کے خلاف ان کا ریکارڈ 32 اننگز میں 1,021 رنزبھی بہترین رہا ہے ۔فل سالٹ کی واپسی، روماریو شیفرڈ کی زبردست بیٹنگ (14 گیندوں پر 53 ناٹ آؤٹ)، اور رجت پاٹیدار، ٹِم ڈیوڈ کی کارکردگی آر سی بی کو متوازن ٹیم بناتی ہے۔گیندبازی میں یش دیال اور آر ڈار جیسے نوجوان گیندبازوں پر دباؤ ہوگا۔کے کے آر کی حالت کمزور ہے، پچھلے پانچ میچوں میں صرف دو فتوحات حاصل ہوئیں۔آندرے رسل نے گزشتہ دو میچز میں 95 رنز بنا کر امید دلائی ہے، جبکہ اجنکیا رہانے 375 رنز کے ساتھ سرفہرست ہیں۔نوجوان انگرکش رگھوونشی بھی 145.17 کے اسٹرائیک ریٹ کے ساتھ متاثر کر رہے ہیں۔
کے کے آر کا اسپن اٹیک، جس میں سنیل نارائن اور ورون چکرورتی شامل ہیں، اس پچ پر اہم کردار ادا کرسکتا ہے۔ نارائن کی آل راؤنڈ کارکردگی قابل تعریف ہے۔ونکٹیش ایر کے زخمی ہونے کے بعد منیش پانڈے، جنہوں نے پچھلے میچ میں 36 ناٹ آؤٹ بنائے، پلیئنگ الیون میں برقرار رہ سکتے ہیں۔چناسوامی اسٹیڈیم کی پچ بلے بازی کے لیے سازگار ہے، پہلی اننگز کا اوسط اسکور تقریباً 168 ہے اور پچھلے دونوں میچ پہلے بیٹنگ کرنے والی ٹیموں نے جیتے ہیں۔ ایسے میں 200 کا ہدف ممکن ہے۔
