حیدرآباد، 23 مارچ (یو این آئی) ایشان کشن (ناٹ آوٹ 106) کی طوفانی سنچری اور ٹریوس ہیڈ (67) کی شاندار نصف سنچری کے بعد گیند بازوں کی بہترین کارکردگی کی بدولت، اتوار کو انڈین پریمیئر لیگ (آئی پی ایل) 2025 کے دوسرے مقابلے میں سن رائزرز حیدرآباد نے راجستھان رائلز کو دلچسپ مقابلے میں 44 رنز سے شکست دے دی۔287 رنز کے بڑے ہدف کا تعاقب کرنے کے لیے میدان میں اتری راجستھان رائلز کی شروعات اچھی نہیں رہی اور تیز رفتاری سے رنز بنانے کی کوشش میں ٹیم نے محض 50 رنز کے اسکور پر اپنے تین اہم وکٹ گنوا دیے۔ یشسوی جیسوال (1)، کپتان ریان پراگ (4) اور نیتیش رانا (11) جلد ہی آؤٹ ہو گئے۔اس کے بعد بیٹنگ کے لیے آنے والے دھروو جوریل نے سنجو سیمسن کے ساتھ مل کر اننگز کو سنبھالنے کی کوشش کی۔ دونوں بلے بازوں کے درمیان چوتھے وکٹ کے لیے 111 رنز کی شراکت ہوئی۔ 14ویں اوور میں ہرشل پٹیل نے سنجو سیمسن کو آؤٹ کرکے اس شراکت کو توڑ دیا۔ سیمسن نے 37 گیندوں پر سات چوکے اور چار چھکے لگا کر 66 رنز کی شاندار اننگز کھیلی۔اگلے ہی اوور میں ایڈم زامپا نے دھروو جوریل کو بھی پویلین بھیج کر راجستھان کی امیدوں پر پانی پھیر دیا۔ جوریل نے 35 گیندوں میں پانچ چوکے اور چھ چھکے لگا کر 70 رنز کی جارحانہ اننگز کھیلی۔ اس کے بعد شمرون ہیٹمائر اور شبھم دوبے نے جارحانہ انداز میں بلے بازی جاری رکھی۔راجستھان کا چھٹا وکٹ آخری اوور میں شمرون ہیٹمائر کے طور پر گرا۔ ہیٹمائر نے 23 گیندوں میں ایک چوکا اور چار چھکے لگا کر 42 رنز بنائے۔ شبھم دوبے 11 گیندوں میں ایک چوکا اور چار چھکے لگا کر 34 رنز پر ناٹ آؤٹ رہے۔ تاہم، حیدرآباد کے گیند بازوں کے آگے راجستھان کے بلے باز دباؤ میں نظر آئے اور مقررہ 20 اوورز میں 6 وکٹوں کے نقصان پر 242 رنز ہی بنا سکےاور ٹیم کو 44 رنز سے شکست کا سامنا کرنا پڑا۔سن رائزرز حیدرآباد کی طرف سے سمرجیت سنگھ اور ہرشل پٹیل نے دو، دو وکٹیں حاصل کیں جبکہ محمد شامی اور ایڈم زمپا نے ایک، ایک کھلاڑی کو آؤٹ کیا۔اس سے قبل یہاں راجستھان رائلز نے ٹاس جیت کر پہلے گیندبازی کا فیصلہ کیا۔ بلے بازی کے لیے اتری سنرائزرز حیدرآباد کی اوپننگ جوڑی، ابھیشیک شرما اور ٹریوس ہیڈ نے پہلے وکٹ کے لیے جارحانہ انداز میں 45 رنز جوڑے۔ چوتھے اوور کی پہلی گیند پر مہیش تیکشنا نے ابھیشیک شرما کو آؤٹ کر کے حیدرآباد کو پہلا جھٹکا دیا۔ ابھیشیک شرما نے 11 گیندوں میں پانچ چوکوں کی مدد سے 24 رنز بنائے۔حیدرآباد کی دوسری وکٹ ٹریوس ہیڈ کے طور پر گری۔ ٹریوس ہیڈ نے 31 گیندوں میں نو چوکوں اور تین چھکوں کی مدد سے 67 رنز بنائے۔ اس کے بعد نیتیش کمار ریڈی 15 گیندوں میں 30، ہائنرک کلاسین 14 گیندوں میں 34 رنز بنا کر آؤٹ ہوئے۔ آخری اوور میں انیکیت ورما (سات) اور ابھینو منوہر (صفر) کو توشار دیش پانڈے نے آؤٹ کیا۔سن رائزرز حیدرآباد نے مقررہ 20 اووروں میں چھ وکٹوں کے نقصان پر 286 رنز کا بڑا اسکور کھڑا کیا۔ ایشان کشن نے 47 گیندوں میں 11 چوکوں اور چھ چھکوں کی مدد سے ناٹ آؤٹ 106 رنز کی طوفانی اننگز کھیلی۔راجستھان رائلز کی طرف سے تشار دیش پانڈے نے تین، مہیش نے دو اور سندیپ شرما نے ایک کھلاڑی کو آؤٹ کیا۔
