احمد آباد، 21 فروری (یو این آئی) آدتیہ سروتے اور جلاج سکسینہ (چار وکٹ) کی شاندار گیند بازی کی بدولت کیرالہ اور گجرات کے درمیان جمعہ کو کھیلا گیا پہلا سیمی فائنل میچ ڈرا ہوگیا اور کیرالہ نے پہلی اننگز میں دو رنز کی معمولی برتری کی بنیاد پر رنجی ٹرافی کے فائنل میں اپنی جگہ پکی کرلی۔ گجرات نے کل کے اسکور سات وکٹ پر 429 رنز سے اپنی اننگز دوبارہ شروع کی۔ صبح کے سیشن میں سروتے نے جیمیت پٹیل (78) کو محمد اظہر الدین کے ہاتھوں اسٹمپ کر کے کیرالہ کو 436 پر آٹھویں کامیابی دلائی۔ اس کے بعد سروتے نے سدھارتھ دیسائی (30) کو ایل بی ڈبلیو آؤٹ کیا۔
ارجن ناگواس والا (10) بھی سروتے کے شکار بنے۔ کیرالہ کے گیند بازوں نے گجرات کو 174.4 اوور میں 455 رنز پر سمیٹ کر دو رنز کی برتری حاصل کی۔ کیرالہ کی طرف سے آدتیہ سروتے اور جلاج سکسینہ نے چار چار وکٹیں حاصل کیں۔ ایم ڈی ندھیش اور این پی باسل نے ایک ایک بلے باز کو آؤٹ کیا۔ اس کے بعد کیرالہ نے دوسری اننگز میں بلے بازی کرتے ہوئے 32 کے اسکور پر دو وکٹیں گنوا دیں۔ اکشے چندرن (نو) اور ورون نینار (ایک) آؤٹ ہوئے۔ سدھارتھ دیسائی نے روہن کنومل (32) کو آؤٹ کرکے کیرالہ کو تیسرا جھٹکا دیا۔ کیرالہ نے اپنا چوتھا وکٹ سچن بے بی (10) کی شکل میں کھو دیا۔ کیرالہ کی دوسری اننگز کا اسکور چار وکٹوں پر 114 رنز تھا جب میچ ڈرا قرار دیا گیا۔ گجرات کی جانب سے سدھارتھ دیسائی اور منان ہنگراجیا نے دو دو وکٹیں حاصل کیں۔ واضح رہے کہ کیرالہ نے پہلی اننگز میں 457 رنز بنائے تھے۔ رنجی ٹرافی کا فائنل میچ کیرالہ اور ودربھ کے درمیان کھیلا جائے گا۔
