لاہور، 18 فروری (یواین آئی) چیئرمین پاکستان کرکٹ بورڈ (پی سی بی) محسن نقوی نے کہا ہے کہ پاکستان آئی سی سی چیمپئنز ٹرافی کےلیے پوری طرح تیار ہے۔جنگ نیوز کے مطابق قذافی اسٹیڈیم لاہور میں چیئرمین پی سی بی محسن نقوی کی زیر صدارت اہم اجلاس ہوا جس میں چیمپئنز ٹرافی ٹورنامنٹ کی تیاریوں اور انتظامات کا تفصیلی جائزہ لیا گیا۔چیئرمین پی سی بی نے تمام تر انتظامات کو خوب سے خوب تر بنانے کی ہدایت کی۔ انکا کہنا تھا کہ تمام ٹیموں کو بین الاقوامی معیار کی سہولتیں فراہم کی جائیں گی، اسٹیڈیمز میں شائقین کرکٹ کےلیے ہر ممکن سہولتیں دیں گے۔انہوں نے کہا کہ 29 برس بعد آئی سی سی ٹورنامنٹ کا انعقاد پاکستان کےلیے باعث افتخار ہے۔ چیمپئنز ٹرافی کا شاندار انعقاد یقینی بنا کر پاکستان کی عزت بڑھائیں گے۔اس حوالے سے جاری پی سی بی اعلامیہ میں کہا گیا کہ چیمپئنز ٹرافی کے افتتاحی میچ میں صدر آصف علی زرداری مہمان خصوصی ہوں گے۔
