جالندھر، 26 اکتوبر (یو این آئی) پنجاب کے وزیر خزانہ ہرپال چیمہ نے کہا کہ ریاستی حکومت کی جانب سے زمینی سطح پر کھیلوں کے کلچر کو مضبوط کرنے کے لیے کی جا رہی سرگرم کوششوں کی وجہ سے پنجاب ملک کے لیے کھیلوں کا مرکز بن کر ابھر رہا ہے۔ڈپٹی کمشنر ڈاکٹر ہمانشو اگروال کے ہمراہ 41ویں انڈین آئل سرو سرجیت ہاکی ٹورنامنٹ کے فائنل میچ کی صدارت کرتے ہوئے وزیر خزانہ نے پنجاب کے کھیلوں کے بنیادی ڈھانچے کو مزید مستحکم کرنے کے لیے حکومت پنجاب کے عزم کا اعادہ کیا۔ فائنل میچ بھارت پیٹرولیم کارپوریشن لمیٹڈ اور انڈین آئل کارپوریشن لمیٹڈ کی ٹیموں کے درمیان کھیلا گیا۔پنجاب حکومت کے زیر اہتمام ’کھیڑاں وطن پنجاب دیا‘ کا ذکر کرتے ہوئے، مسٹر ہرپال چیمہ نے کہا کہ ان کھیلوں میں ہر عمر کے کھلاڑیوں نے حصہ لیا، جس سے پنجاب کے کھیلوں کے شعبے میں ایک نئے باب کا اضافہ ہوا ہے۔ انہوں نے کہا کہ کھیلوں کو زندگی کا لازمی حصہ بنانا چاہیے۔ انہوں نے کہا کہ ہمارے گاؤں ہمیشہ سے قدیم کھیلوں کے حامی رہے ہیں اور اب وقت آگیا ہے کہ اس وراثت کو آگے بڑھایا جائے۔
اس دوران پنجاب حکومت کے وزیر خزانہ نے ہاکی کے فروغ کے لیے کی جانے والی کوششوں کو تیز کرنے کے لیے اولمپیئن سرجیت سنگھ رندھاوا کی یاد میں اولمپیئن سرجیت ہاکی سوسائٹی کو اپنے صوابدیدی فنڈ سے 50 لاکھ روپے دینے کا اعلان کیا۔ انہوں نے کہا کہ آنجہانی سرجیت سنگھ 1975 ورلڈ کپ جیتنے والی ٹیم کے رکن بھی تھے۔ 7 جنوری 1984 کو ایک المناک سڑک حادثے میں لیجنڈ انڈین ہاکی فل بیک سرجیت سنگھ اس دنیا سے ہمیشہ کے لیے رخصت ہو گئے۔ انہوں نے کہا کہ اس عظیم کھلاڑی کی یاد میں قائم ہونے والی سرجیت ہاکی سوسائٹی گزشتہ 41 سالوں سے ہاکی کھیل کی خدمت کر رہی ہے جس کے لیے سوسائٹی کے افسران تعریف کی مستحق ہیں۔ انہوں نے کہا کہ یہ ہمارے لیے فخر کی بات ہے کہ ہندوستانی ہاکی ٹیم نے اس بار پیرس اولمپکس میں کانسی کا تمغہ جیتا ہے۔ اس ٹیم میں کپتان سمیت 10 کھلاڑی پنجاب سے تھے۔ وزیر اعلی بھگونت سنگھ مان جی کی قیادت والی حکومت نے ہاکی کے ہر کھلاڑی کو ایک ایک کروڑ روپے دیے۔ اس کے علاوہ ہاکی کے نو کھلاڑیوں کو ماضی میں پی سی ایس اور ڈی ایس پی کی نوکری دی گئی۔وزیر خزانہ نے کہا کہ 1975 کا ہاکی ورلڈ کپ جیتنے والی ہندوستانی ٹیم کے کھلاڑی فخر محسوس کر رہے ہیں۔ انہوں نے کہا کہ ٹیم کے کپتان پدم شری اجیت پال سنگھ، بریگیڈیئر ہرچرن سنگھ، اشوک کمار دھیان چند، اسلم شیر خان، بی پی گووندا، ایچ جے ایس چمنی، پی سی کلہیا، اومکار سنگھ اور لیزلی فرنانڈیز نے آج اس ٹورنامنٹ میں پہنچ کر ہاکی کا سر فخر سے بلند کیا ہے۔ انہوں نے ٹیموں کے کھلاڑیوں کا تعارف بھی کروایا۔ اس سے قبل پنجابی گلوکار جسبیر جسی نے بھی حاضرین کو محظوظ کیا۔
