بھوپال:07؍جولائی:نائب وزیر اعلیٰ مسٹر راجیندر شکل نے وزارت میں ریاست کے میڈیکل سپلائی چین نظام کی عملی منصوبہ بندی کا جائزہ لیا۔ انہوں نے ہدایات دیں کہ ریاست کے تمام صحت کے اداروں میں ضرورت کے مطابق معیاری ادویات کی بروقت دستیابی یقینی بنائی جائے۔ ادویات کی طلب، ذخیرہ، معیار کی جانچ، تقسیم اور مریض تک حقیقی دستیابی کے پورے عمل کو مؤثر، شفاف اور ٹیکنالوجی پر مبنی بنایا جائے۔ نائب وزیر اعلیٰ مسٹر شکلا نے کہا کہ ادویات کی بروقت جانچ یقینی بنائی جائے اور معیار کی جانچ مکمل ہونے کے بعد ہی ادویات تقسیم کی جائیں۔ تمام سطحوں پر مناسب ذخیرہ دستیاب رہے اور طلب و رسد کے فرق کی صورتِ حال پیدا نہ ہو۔ انہوں نے ہدایات دیں کہ مریضوں کو ادویات کی تقسیم آسانی سے ہو اور ادویات کی دستیابی کے سلسلے میں کسی بھی سطح پر غیر ضروری دشواری پیش نہ آئے۔ نائب وزیر اعلیٰ مسٹر شکلا نے کہا کہ ٹیکنالوجی پر مبنی میڈیکل سپلائی چین نظام کے ذریعے ادویات کی دستیابی اور تقسیم کی مسلسل نگرانی ممکن ہوگی۔ اس کے ساتھ ساتھ صحت کی خدمات کی فراہمی کا معیار مزید مضبوط اور زیادہ مؤثر ہوگا۔
کمشنر صحت مسٹر دھن راجو ایس نے میڈیکل سپلائی چین نظام کی مجوزہ عملی منصوبہ بندی کے بارے میں تفصیل سے معلومات دیں۔ انہوں نے بتایا کہ ریاست کے تمام ڈویڑنل ہیڈکوارٹروں پر 10 ویئر ہاؤس قائم کیے جائیں گے۔ ان ویئر ہاؤسز میں ادویات کے محفوظ اور منظم ذخیرہ کی سہولت فراہم کی جائے گی۔ ہائی اینڈ ٹیکنالوجی سلوشنز کے استعمال سے ادویات کی ریئل ٹائم ٹریکنگ اور اسٹاک کی صورتِ حال کی مسلسل نگرانی کی جائے گی۔ اس سے میڈیکل سپلائی چین میں اینڈ ٹو اینڈ انٹیگریشن یقینی ہوگا۔ ادویات کی دستیابی، اسٹاک کی صورتِ حال، طلب اور تقسیم کی معلومات حقیقی وقت میں حاصل کی جا سکیں گی۔کمشنر صحت مسٹر دھن راجو ایس نے بتایا کہ یہ نظام علاقے، مرکز اور صحت کے ادارے کی سطح پر ادویات کی طلب کا اندازہ لگانے میں بھی معاون ہوگا۔ اس کی بنیاد پر ضرورت کے مطابق بہتر منصوبہ بندی کرتے ہوئے ادویات کی فراہمی یقینی بنائی جا سکے گی۔ اس سے آخری صارف یعنی مریض تک معیاری ادویات کی بروقت دستیابی یقینی ہوگی۔ مدھیہ پردیش پبلک ہیلتھ سروسز کارپوریشن لمیٹڈ کے ذریعے ادویات کی خریداری کی جائے گی۔ سپلائرز کی جانب سے ادویات ویئر ہاؤس تک پہنچائی جائیں گی۔ ویئر ہاؤس میں ادویات کا مناسب ذخیرہ یقینی بنایا جائے گا اور ادویات کے معیار کی بروقت جانچ کرائی جائے گی۔ این اے بی ایل سے منظور شدہ تجربہ گاہ میں جانچ مکمل ہونے کے بعد ہی ادویات کو تقسیم کے لیے بھیجا جائے گا۔
معیار کی جانچ کے بعد ادویات کو میڈیکل کالجوں، ضلعی اسپتالوں، چیف میڈیکل اینڈ ہیلتھ آفیسر کے دفاتر کے ادویاتی ذخائر، سول اسپتالوں اور کمیونٹی ہیلتھ سینٹروں تک تقسیم کیا جائے گا۔ آئندہ مرحلے میں اس نظام کو پرائمری ہیلتھ سینٹروں اور کمیونٹی ہیلتھ سینٹروں تک مربوط کیا جائے گا۔ اس کے ساتھ مریض کو ادویات کی حقیقی تقسیم کی معلومات بھی ریئل ٹائم میں درج کرنے کا نظام تیار کیا جائے گا۔ اجلاس میں مدھیہ پردیش پبلک ہیلتھ سروسز کارپوریشن لمیٹڈ کے منیجنگ ڈائریکٹر مسٹر میانک اگروال سمیت محکمہ کے سینئر افسران موجود تھے۔
