بھوپال 19مئی: وزیر اعلیٰ ڈاکٹر موہن یادو نے چھتیس گڑھ کے بستر میں منعقدہ وسطی علاقائی کونسل کے اجلاس میں ریاست میں کیے گئے عوامی فلاحی کاموں اور بہتر طرزِ حکمرانی کے اقدامات کے بارے میں معلومات فراہم کیں۔ مرکزی وزیر داخلہ و تعاون مسٹر امت شاہ کی صدارت میں منعقد ” وسطی علاقائی کونسل کے 26 ویں اجلاس” میں شرکت کرتے ہوئے انہوں نے تعاون، سائبر سکیورٹی، تعلیم، شہری ترقی، صحت، خواتین و اطفال کی بہبود، ڈیجیٹل بنیادی ڈھانچے کی ترقی، دودھ کی پیداوار اور دیگر شعبوں میں مدھیہ پردیش کی پیش رفت سے متعلق معلومات پیش کیں۔ وزیر اعلیٰ ڈاکٹر یادو نے بتایا کہ مدھیہ پردیش نے مرکزی حکومت کی مقرر کردہ مدت سے پہلے نکسل مسئلے کے خاتمے میں کامیابی حاصل کی ہے۔ انہوں نے کہا کہ ریاست کے نکسل متاثرہ اضلاع میں خصوصی کوششوں کے ذریعے کامیابیاں حاصل کی گئیں۔ جہاں کئی انعام یافتہ نکسل افراد نے خودسپردگی کی، وہیں متعدد نکسل عناصر کا خاتمہ بھی کیا گیا۔ سیکیورٹی اہلکاروں اور فورسز کو ضروری حوصلہ افزائی بھی فراہم کی گئی۔ اس کے نتیجے میں عوام کے دلوں میں حکومت کے لیے اعتماد میں اضافہ ہوا ہے۔ اجلاس میں “نکسل سے پاک بھارت” کے لیے وزیر اعظم مسٹر نریندر مودی اور مرکزی وزیر داخلہ مسٹر امت شاہ کا ریاست کے عوام کی جانب سے شکریہ ادا کیا گیا۔ ریاست میں پہلے نکسل سے متاثر رہنے والے علاقوں کی ترقی کے لیے نئے اہداف مقرر کیے گئے ہیں۔
نکسل سے متاثرہ دیہات کے لیے 330 کروڑ روپے کی لاگت سے مائیکرو ڈیولپمنٹ اسکیم نافذ کی گئی ہے۔ مختلف اسکیموں کے تحت سڑکیں، پل، موبائل ٹاور اور نئی سیکیورٹی سہولیات قائم کی جا رہی ہیں۔ اس کے ساتھ عوامی فلاح، سلامتی اور علاقائی ترقی سے متعلق کئی اہم موضوعات پر بھی مفصل گفتگو ہوئی۔ اس موقع پر اتر پردیش کے وزیر اعلیٰ مسٹر یوگی آدتیہ ناتھ، اتراکھنڈ کے وزیر اعلیٰ مسٹر پشکر سنگھ دھامی اور میزبان ریاست چھتیس گڑھ کے وزیر اعلیٰ مسٹر وشنو دیو سائے موجود تھے۔ مدھیہ پردیش کے پارلیمانی امور کے وزیر مسٹر کیلاش وجے ورگیہ نے بھی اجلاس میں شرکت کی۔
اجلاس میں کئی عوامی نمائندے بھی موجود تھے۔
