نئی دہلی 17اپریل: وزیر داخلہ امت شاہ ناری شکتی وندن ایکٹ پر لوک سبھا سے خطاب کر تے ہو ئے اپوزیشن پر جم کر نشانہ سادھا۔۔ اس موقع پر انہوں نے اپوزیشن پر خواتین کے ریزرویشن کی مخالفت کا الزام لگایا۔ انہوں نے کہا کہ اپوزیشن کی مخالفت اس بل کے نفاذ کے خلاف نہیں بلکہ خود خواتین کے ریزرویشن کے خلاف ہے۔ انہوں نے یہ بھی کہا کہ ہم 2029 تک خواتین کو بااختیار بنانے کے وزیر اعظم نریندر مودی کے وعدے کو پورا کرنے جا رہے ہیں۔انہوں نے کہا کہ میں وعدہ کرتا ہوں کہ 2029 کے لوک سبھا انتخابات خواتین کے ریزرویشن کے ساتھ ہوں گے۔ امت شاہ نے ایوان میں کہا کہ گزشتہ کچھ سالوں میں سیاست میں خواتین کی شرکت میں مسلسل اضافہ ہوا ہے۔ انہوں نے نشاندہی کی کہ پہلی لوک سبھا میں 22 خواتین ممبران تھیں، لیکن 14ویں لوک سبھا میں یہ تعداد بڑھ کر 51 ہو گئی۔ مزید برآں، 17ویں لوک سبھا میں 71 خواتین اور 18ویں لوک سبھا میں 75 خواتین منتخب ہوئیں۔ اعداد و شمار واضح طور پر خواتین کے بڑھتے ہوئے سیاسی رجحان کو ظاہر کرتے ہیں۔ انہوں نے کہا کہ اس شرکت کو مزید بڑھانے کے لیے ہمیں ایک بڑا پلیٹ فارم فراہم کرنے کی ضرورت ہے۔ انہوں نے مزید کہا کہ حکومت نے اس کوشش کی مکمل حمایت کی ہے۔ انہوں نے اوما بھارتی، آنندی بین پٹیل، سشما سوراج، اور وسندھرا راجے جیسے اراکین کو ترقی دی۔ ہم نے ایک قبائلی خاتون کو صدر بنایا۔
