رائسین:04؍نومبر: ضلع کلکٹر روہت سسونیہ نے بدھ کے روز ضلع کے دیہی علاقے گرام ہینوتیا مہالپور کا دورہ کرکے سرکاری اسکیموں اور ترقیاتی کاموں کی زمینی صورتحال کا جائزہ لیا۔ اس دوران انہوں نے سرکاری مڈل اسکول پہنچ کر تعلیمی انتظامات کا معائنہ کیا اور طلبہ کے ساتھ بیٹھ کر دوپہر کا کھانا بھی تناول کیا۔
کلکٹر نے اسکول کی مختلف جماعتوں میں پہنچ کر تدریسی نظام اور تعلیم کے معیار کا جائزہ لیا۔ انہوں نے بچوں سے تعلیم سے متعلق سوالات کیے اور ان کی تعلیمی سرگرمیوں کی معلومات حاصل کیں۔ اس کے علاوہ اساتذہ سے بھی تعلیمی انتظامات کے سلسلے میں تبادلۂ خیال کیا۔
بعد ازاں کلکٹر نے آنگن واڑی مرکز کا معائنہ کیا، جہاں انہوں نے ننھے بچوں سے بات چیت کرتے ہوئے ان کی غذائیت، دیکھ بھال اور مرکز میں دستیاب سہولیات کے بارے میں معلومات حاصل کیں۔
گاؤں کے دورے کے دوران کلکٹر نے چوپال لگاکر دیہی عوام سے براہِ راست گفتگو کی اور ان کے مسائل و شکایات سماعت کیں۔ ساتھ ہی حکومت کی مختلف عوامی فلاحی اسکیموں سے مستفید ہونے کے بارے میں بھی معلومات حاصل کیں۔
اس موقع پر کلکٹر کسان بھگوان سنگھ سنگوریا کے کھیت پہنچے، جہاں انہوں نے باغ کا مشاہدہ کیا۔ اس کے علاوہ یشونتی بائی کی جانب سے تیار کی گئی ’’ماں کی باگیا‘‘ کا بھی معائنہ کیا۔ انہوں نے کسانوں کی کھیتی باڑی اور باغبانی سے متعلق سرگرمیوں کا جائزہ لیتے ہوئے دیہی علاقوں میں ہونے والی جدید کوششوں کی معلومات حاصل کیں۔
اس موقع پر گرام سرپنچ پریم سنگھ ٹھاکر، سب ڈویژنل افسر ہرشل چودھری، تحصیلدار محترمہ امرتا سمن، نائب تحصیلدار، چیف ایگزیکٹیو آفیسر یشپال سنگھ سونکر، ایس ڈی او آر ای ایس نریش سنگھ ٹھاکرے سمیت مختلف محکموں کے افسران، ملازمین اور عوامی نمائندے موجود رہے۔
