ممبئی 15مارچ:بالی ووڈ کی مشہور ہستی امیتابھ بچن کے اسپتال میں داخل ہونے کی خبر نے ان کے چاہنے والوں میں فکر کی لہر دوڑا دی ہے۔ انھیں آج صبح سویرے ممبئی کے کوکیلابین اسپتال میں داخل کروایا گیا تھا اور اب خبریں سامنے آ رہی ہیں کہ اس 81 سالہ اداکار کی انجیوپلاسٹی ہوئی ہے۔ یہ خبر پھیلتے ہی امیتابھ بچن کے شیدائی ان کی صحت کو لے کر پریشان ہو گئے ہیں۔ حالانکہ ایسی کوئی گھبرانے والی بات نہیں ہے، اور موصولہ اطلاعات کے مطابق امیتابھ بچن صحت مند ہیں۔ ہندی نیوز پورٹل ’بھاسکر ڈاٹ کام‘ کی ایک رپورٹ میں بتایا گیا ہے کہ امیتابھ بچن کو جمعہ کی صبح 6 بجے کوکیلابین اسپتال میں داخل کرایا گیا تھا۔ سخت سیکورٹی کے درمیان وہ اسپتال میں داخل ہوئے اور پھر ان کی انجیوپلاسٹی کرائے جانے کی اطلاع میڈیا کو ملی۔ بعد ازاں دوپہر میں امیتابھ بچن نے خود سوشل میڈیا پلیٹ فارم ’ایکس‘ پر ایک پوسٹ کیا جس میں لکھا ’اِن گریٹیٹیوڈ ایور…‘‘ یعنی ’ہمیشہ شکرگزار‘۔ اس طرح بگ بی نے اپنے چاہنے والوں کے تئیں شکریہ ادا کیا جو کہ انھیں اسپتال میں داخل کیے جانے کی خبر پا کر صحت مندی کی دعائیں کر رہے تھے۔
قابل ذکر ہے کہ امیتابھ بچن 81 سال کی عمر میں بھی پوری طرح سرگرم ہیں اور فلموں میں لگاتار کام کر رہے ہیں۔ وہ اپنی فلموں کے ساتھ ساتھ اپنی صحت کو لے کر بھی اکثر سرخیوں میں رہتے ہیں۔ ان کے پاس فی الحال کئی ساری فلمیں موجود ہیں جن پر لگاتار کام جاری ہے۔ امیتابھ بچن کی آنے والی فلموں کی لسٹ کافی طویل ہے اور اس میں کئی بڑے بجٹ والی فلمیں بھی شامل ہیں۔
