بھوپال، 14 اپریل: مدھیہ پردیش کے حزب اختلاف رہنما جناب امنگ سنگھار نے آج ڈاکٹر امبیڈکر نگر (مہو) میں بھارت رتن بھیم راؤ امبیڈکر کی 135 ویں جینتی کے موقع پر ان کی جائے پیدائش پہنچ کر خراجِ عقیدت پیش کیا۔ اس موقع پر کانگریس کارکنوں کی بڑی تعداد موجود تھی۔ میڈیا سے بات کرتے ہوئے جناب سنگھار نے کہا کہ بابا صاحب کی جینتی پورے ملک میں ایک بیداری اور شعور کے طور پر منائی جاتی ہے اور لوگ ان کے افکار و نظریات پر عمل پیرا ہیں۔
امنگ سنگھار نے بی جے پی حکومت کے ذریعے مجوزہ یکساں سول کوڈ (یو سی سی) پر سخت تنقید کرتے ہوئے کہا کہ بابا صاحب ہمیشہ تمام طبقات کے لیے برابری اور مساوات کی بات کرتے تھے، لیکن بی جے پی جو یو سی سی لانے جا رہی ہے وہ ’سماجی مساوات کا قانون‘ نہیں بلکہ بی جے پی کا ’کنٹرول شہری قانون‘ ہے۔ انہوں نے سوال اٹھایا کہ بی جے پی وضاحت کرے کہ کیا یو سی سی میں دلتوں اور آدیواسیوں کے حقوق کو محفوظ رکھا جائے گا؟
حزب اختلاف رہنما نے آر ایس ایس اور وزیر اعلیٰ کو بھی نشانے پر لیتے ہوئے کہا کہ آج یہاں وزیر اعلیٰ اور آر ایس ایس کے لوگ بھی آئے، لیکن آر ایس ایس نے کبھی کسی دلت یا آدیواسی کو ’سرسنگھ چالک‘ نہیں بنایا۔ انہوں نے وزیر اعلیٰ سے پوچھا کہ یہ کیسی مساوات ہے؟ امنگ سنگھار نے اپنی بات ختم کرتے ہوئے کہا کہ آج اصل لڑائی مساوات اور آئین کو بچانے کی ہے، اس لیے ہر شخص کو بابا صاحب کے نظریات کو اپنانا چاہیے تاکہ اس لڑائی کو جیتا جا سکے۔
