چینئی 13اپریل: تمل ناڈو میں جیسے جیسے 2026 کے اسمبلی انتخابات قریب آ رہے ہیں، سیاسی ماحول انتہائی گرم ہوتا جا رہا ہے۔ ریاست کے چیف منسٹر ایم کے اسٹالن اور مرکزی وزیر خزانہ نرملا سیتارامن کے درمیان حالیہ تنازع نے انتخابی سیاست کو مزید تلخ بنا دیا ہے۔ یہ تنازع کسانوں کے بونس، زرعی پالیسی اور مرکز۔ریاست تعلقات کے گرد گھوم رہا ہے، جسے دونوں پارٹیاں اپنے اپنے سیاسی فائدے کے لیے استعمال کر رہی ہیں۔ یہ پورا معاملہ جنوری 2026 میں مرکزی وزارت خزانہ کے اخراجات کے محکمہ کی جانب سے تمام ریاستوں کے چیف سیکریٹریز کو بھیجے گئے ایک خط سے شروع ہوا۔ اس خط میں ریاستوں کو مشورہ دیا گیا تھا کہ وہ اپنی بونس پالیسی (MSP سے اوپر اضافی ادائیگی) کو دالوں، تیل دار اجناس اور موٹے اناج (ملیٹس) کی پیداوار بڑھانے کے لیے استعمال کریں۔
