بھوپال، 25 اکتوبر: وزیراعلیٰ ڈاکٹر موہن یادو نے کہا ہے کہ تیندو پتہ جمع کرنا لاکھوں قبائلی خاندانوں کی روزی روٹی کا ذریعہ ہے۔ ریاستی حکومت اس بات کو یقینی بنا رہی ہے کہ محنت کش خاندانوں کو ان کے حقوق کا پورا فائدہ وقت پر ملے۔ وزیراعلیٰ ڈاکٹر یادو نے اتوار کو شہڈول ڈویژنل ہیڈکوارٹر میں منعقدہ ایک شاندار پروگرام میں تیندو پتہ جمع کرنے کے سال 2024 کے 9 لاکھ 77 ہزار 696 اہل جمع کنندگان میں 22 کروڑ 89 لاکھ روپے سے زائد کی ترغیبی اجرت کی رقم (تیندو پتہ بونس) تقسیم کی۔ پروگرام میں 5 اضلاع، شہڈول، عمریہ، انوپور، ستنا اور سیدی کے تحت آنے والی 6 ضلعی جنگلاتی پیداوار کوآپریٹو یونینوں سے وابستہ ہزاروں تیندو پتہ اور دیگر جنگلاتی پیداوار جمع کرنے والوں نے شرکت کی۔ وزیراعلیٰ ڈاکٹر یادو نے اعلان کیا کہ شہڈول میں انڈور اسپورٹس کمپلیکس تعمیر کیا جائے گا، جنگلی ہاتھیوں کے حملوں سے تباہ ہونے والے مکانات کی جگہ متاثرین کو پکے مکانات بناکر دیے جائیں گے، جے سنگھ نگر اسمبلی حلقے میں گوہپارو سے ریوا-ستنا روڈ تک سڑک تعمیر کی جائے گی اور شہڈول میں نجی شراکت داری سے ایک نئی یونیورسٹی قائم کی جائے گی۔
وزیراعلیٰ ڈاکٹر یادو نے کہا کہ بونس اور منافع کی یہ رقم دیہی اور جنگلاتی علاقوں میں رہنے والے خاندانوں کو معاشی طور پر مضبوط بنانے میں اہم کردار ادا کرے گی۔ ہماری حکومت قبائلی برادریوں کے احترام، خود کفالت اور مجموعی فلاح و بہبود کے لیے مسلسل کام کر رہی ہے۔ اس موقع پر وزیراعلیٰ نے 462 کروڑ روپے کی لاگت کے 134 ترقیاتی کاموں کا افتتاح اور سنگ بنیاد رکھا۔ وزیراعلیٰ نے شہڈول میں 22.14 کروڑ روپے کی لاگت سے تعمیر شدہ ڈویژنل فارسٹ آفیسر کے دفتر کا افتتاح کیا۔ اس کے علاوہ مختلف سرکاری اسکیموں کے اہل مستفیدین میں بھی امدادی فوائد تقسیم کیے۔
وزیراعلیٰ نے اعلان کیا کہ شہڈول میں جدید ترین سہولیات سے آراستہ انڈور اسپورٹس کمپلیکس تعمیر کیا جائے گا۔ جے سنگھ نگر اسمبلی حلقے کے گوہپارو میں شہڈول-ریوا مین روڈ سے کالج اور صنعتی تربیتی مرکز تک سڑک تعمیر کی جائے گی۔ وزیراعلیٰ نے شہڈول میں گیتا بھون تعمیر کرنے اور نجی سرمایہ کاری و شراکت داری سے ایک نجی یونیورسٹی قائم کرنے کا بھی اعلان کیا۔ شہڈول میں نئے کالج کے مطالبے پر وزیراعلیٰ نے کہا کہ یہاں کی شنبھو ناتھ شکلا یونیورسٹی کے کالج کو اب مشترکہ نظام کے تحت کردیا جائے گا۔ اس کالج میں طلبہ و طالبات کو مشترکہ تعلیم فراہم کی جائے گی۔
وزیراعلیٰ نے کہا کہ عمریہ ضلع میں آمد و رفت کے ایک خستہ حال راستے پر مدھیہ پردیش روڈ ڈیولپمنٹ کارپوریشن (ایم پی آر ڈی سی) کی جانب سے نئی سڑک تعمیر کی جائے گی۔ انہوں نے اعلان کیا کہ جنگلی ہاتھیوں کے انسانی آبادی میں داخل ہونے کے دوران جن لوگوں کے مکانات تباہ ہوئے ہیں، محکمہ جنگلات ان تمام متاثرین کو پکے مکانات بناکر دے گا۔ متاثرین کے نئے مکانات کے گرد حفاظتی باڑ بھی لگائی جائے گی۔
