نئی دہلی 20مئی: کسان فلاحی سال میں مدھیہ پردیش کے کسانوں کو بڑا تحفہ دیتے ہوئے وزیرِ اعلیٰ ڈاکٹر موہن یادو نے وزیرِ اعظم فصل بیمہ یوجنا کو اگلے پانچ سال تک جاری رکھنے کا فیصلہ کیا ہے۔ یوجنا کے مؤثر نفاذ کے لیے وزیرِ اعلیٰ کی صدارت میں بدھ کو منعقدہ کابینہ میٹنگ میں 11608.47 کروڑ روپے منظور کیے گئے ہیں۔قدرتی آفات سے فصلوں کو نقصان پہنچنے پر کسانوں کو مدد فراہم کرنے کے لیے اس یوجنا کا نفاذ کیا جا رہا ہے۔ یوجنا کے نفاذ، فصل کی حالت اور پیداوار کے تعین میں ٹیکنالوجی کے استعمال کے معاملے میں مدھیہ پردیش ملک کی صفِ اول کی ریاست ہے۔
سال 2023-24 میں 35.18 لاکھ کسان درخواستوں پر 961.68 کروڑ روپے کے دعووں کی ادائیگی کی گئی۔ سال 2024-25 میں 35.56 لاکھ کسان درخواستوں پر 275.86 کروڑ روپے کے دعووں کی ادائیگی کی گئی۔ریاست میں سال 2016 سے کسانوں کو وزیرِ اعظم فصل بیمہ یوجنا کا فائدہ مل رہا ہے۔
اس یوجنا میں شامل کسانوں کو فصل خراب یا نقصان ہونے پر مالی مدد دی جاتی ہے۔ خریف موسم میں بیمہ شدہ رقم کا 2 فیصد اور ربیع موسم میں 1.5 فیصد زیادہ سے زیادہ پریمیم کسانوں کو ادا کرنا ہوتا ہے۔ کسانوں کے ادا کردہ پریمیم اور بیمہ شدہ پریمیم کی شرح کے فرق کو عمومی پریمیم سبسڈی کی شرح مانا جاتا ہے۔ اس کی رقم مرکز اور ریاستی حکومت برابر برابر برداشت کرتی ہیں۔مرکزی حکومت کی جانب سے سیراب اور غیر سیراب اضلاع کی فصلوں کے لیے پریمیم سبسڈی کی حد بالترتیب 25 فیصد اور 30 فیصد مقرر کی گئی ہے۔ اگر اس حد سے زیادہ شرحیں سامنے آتی ہیں تو اضافی بوجھ ریاستی حکومت برداشت کرتی ہے۔ مدھیہ پردیش میں معاوضے کی سطح 80 فیصد مقرر کی گئی ہے۔ آنے والے برسوں میں بھی تمام فصلوں کے لیے معاوضے کی سطح 80 فیصد برقرار رکھی گئی ہے۔ وزیرِ اعظم فصل بیمہ یوجنا کے نفاذ کے لیے ریاست اپنی ضرورت کے مطابق مناسب ماڈل منتخب کر سکتی ہے۔پہلا ‘‘کپ اینڈ سرپلس شیئرنگ 80-110 ماڈل’’ اور دوسرا ‘‘کپ اینڈ کیپ سرپلس شیئرنگ 60-130 ماڈل’’ ہے۔
کپ اینڈ کیپ سرپلس شیئرنگ 80-110 ماڈل کے تحت مجموعی پریمیم کے 110 فیصد تک کے کلیم کی ذمہ داری بیمہ کمپنی اٹھاتی ہے۔ 110 فیصد سے زائد اضافی کلیم کی رقم ریاستی حکومت برداشت کرتی ہے۔ اگر کلیم 80 فیصد سے کم بنتا ہے تو کلیم اور 80 فیصد کے فرق کی زائد رقم بیمہ کمپنی ریاستی حکومت کو واپس کرتی ہے۔
کپ اینڈ کیپ سرپلس شیئرنگ 60-130 ماڈل کے تحت مجموعی پریمیم کے 130 فیصد تک کے کلیم کی ذمہ داری بیمہ کمپنی اٹھاتی ہے۔ 130 فیصد سے زائد اضافی کلیم کی رقم ریاستی اور مرکزی حکومت برابر تناسب سے برداشت کرتی ہیں۔ اگر کلیم 60 فیصد سے کم بنتا ہے تو کلیم اور 60 فیصد کے فرق کی زائد رقم بیمہ کمپنی ریاستی اور مرکزی حکومت کو واپس کرتی ہے۔ ماڈل کا فیصلہ اس کے فوائد اور خامیوں کی بنیاد پر کیا جائے گا۔
کسانوں کو فوائد
وزیرِ اعظم فصل بیمہ یوجنا قدرتی آفات کی وجہ سے ہونے والے مالی نقصان کی صورت میں کسانوں کی مدد کرتی ہے۔ اس یوجنا کے تحت کسانوں کی جانب سے ادا کی جانے والی بیمہ پریمیم کی رقم بہت کم رکھی گئی ہے۔ چھوٹے کسان بھی اس یوجنا سے فائدہ اٹھا رہے ہیں۔ یہ یوجنا 2 فیصد (خریف فصلیں)، 1.5 فیصد (ربیع فصلیں) اور 5 فیصد (سالانہ تجارتی اور باغبانی فصلیں) کی پریمیم شرح پر کسانوں کے اخراجات کم کرنے اور ان کی آمدنی کو مستحکم رکھنے کے مقصد سے فصل خراب ہونے کی صورت میں جامع بیمہ تحفظ فراہم کرتی ہے۔
وزیرِ اعظم فصل بیمہ یوجنا کا نفاذ ریاست کے اضلاع میں 11 کلسٹروں میں کیا جا رہا ہے۔ ہر کلسٹر کے لیے بیمہ کمپنیوں کا انتخاب ٹینڈر کے ذریعے کیا گیا ہے۔
فصل کی پیداوار کا تخمینہ سیٹلائٹ پر مبنی ریموٹ سینسنگ ٹیکنالوجی سے لگایا جا رہا ہے۔ اس کے لیے محکمہ زراعت نے نیشنل ریموٹ سینسنگ سینٹر (اسرو)، مدھیہ پردیش کونسل آف سائنس اینڈ ٹیکنالوجی اور مدھیہ پردیش اسٹیٹ الیکٹرانکس کارپوریشن کے ساتھ معاہدہ کیا ہے۔ موسمی معلوماتی نظام اور ڈیٹا سسٹم کے استعمال کے ذریعے یوجنا نافذ کی جائے گی۔
