بھوپال:19؍جون:صدر جمہوریہ محترمہ دروپدی مرمو نے کہا ہے کہ عالمی یومِ سِکل سیل کے موقع پر اس خصوصی پروگرام کا انعقاد صحت کے شعبے میں ایک اہم چیلنج سے نمٹنے کی سمت ایک بامعنی کوشش ہے۔ میں اس پروگرام سے وابستہ تمام افراد کی ستائش کرتی ہوں۔ قومی سِکل سیل انیمیا خاتمہ مشن کے تحت مدھیہ پردیش نے جو ہمہ جہت کامیابیاں حاصل کی ہیں، ان کے لیے میں ریاستی حکومت کی تعریف کرتی ہوں۔ صدر محترمہ مرمو جمعہ کے روز ضلع کھنڈوا کے اونکاریشور میں عالمی یومِ سِکل سیل کے موقع پر منعقد ریاستی سطح کے پروگرام سے خطاب کر رہی تھیں۔ صدرجمہوریہ محترمہ مرمو نے چراغ روشن کرکے ریاستی سطح کے پروگرام کا افتتاح کیا۔ گورنر مسٹر منگوبھائی پٹیل اور وزیرِ اعلیٰ ڈاکٹر یادو نے صدر کا استقبال کیا۔
صدرجمہوریہ محترمہ مرمو نے کہا کہ یہ اطمینان کی بات ہے کہ سال 2023 میں قومی مشن کے آغاز کے وقت جو بڑے اہداف ملک کے سامنے رکھے گئے تھے، ان میں اسکریننگ کا ہدف مقررہ وقت سے پہلے ہی مکمل کر لیا گیا۔ مجھے بتایا گیا ہے کہ نوزائیدہ بچوں سے لے کر 40 سال کی عمر تک کے 7 کروڑ افراد کی اسکریننگ کا ہدف پورا ہو چکا ہے۔ یہ کوئی معمولی کامیابی نہیں ہے۔ یہ پوری دنیا میں موروثی بیماریوں کی جانچ کے سب سے بڑے اقدامات میں سے ایک ہے۔ صدرجمہوریہ نے کہا کہ اس کامیابی میں مدھیہ پردیش کا اہم کردار ہے۔ ریاست میں اب تک ایک کروڑ پچیس لاکھ سے زیادہ افراد کی اسکریننگ کی جا چکی ہے۔ ان میں سے بیشتر افراد کو جینیاتی مشاورتی کارڈ بھی فراہم کیے جا چکے ہیں۔
صدرجمہوریہ محترمہ مرمو نے کہا کہ سِکل سیل سے متعلق چیلنج کو حکومتِ ہند نے انتہائی سنجیدگی سے لیا اور گزشتہ چند برسوں میں جامع نقطہ نظر کے ساتھ حکومت نے جو کوششیں کی ہیں وہ انتہائی قابلِ تعریف ہیں۔ تقریباً تین سال قبل وزیرِ اعظم مسٹر نریندر مودی نے مدھیہ پردیش کے شہڈول سے قومی سِکل سیل انیمیا خاتمہ مشن کا آغاز کیا تھا۔ اس اقدام کے پیچھے نہ صرف حکومت کی سنجیدہ کوشش اور مضبوط عزم تھا بلکہ اس چیلنج سے وابستہ ہر پہلو کا مناسب جواب دینے والی دور اندیش سوچ بھی شامل تھی۔
صدرجمہوریہ محترمہ مرمو نے کہا کہ مجھے بتایا گیا ہے کہ مرکزی وزارتِ صحت اور مرکزی وزارتِ قبائلی امور کے مشترکہ ماڈل کے طور پر ملک میں پہلی بار ایسا مشن شروع کیا گیا۔ اسے صرف صحت سے متعلق مسئلہ نہیں سمجھا گیا بلکہ قبائلی صحت، موروثی آگاہی، احتیاطی صحت نگہداشت کے چیلنج اور سماجی رویوں میں تبدیلی کے مشن کے طور پر بھی دیکھا گیا۔ اس مشن کے پس منظر میں مختلف سطحوں پر کیے گئے سائنسی اور سماجی مطالعات شامل رہے ہیں۔ آئی سی ایم آر، ٹرائبل ہیلتھ ریسرچ انسٹی ٹیوٹس، ایمس، این ایچ ایم، ڈبلیو ایچ او اور مختلف ریاستی حکومتوں نے اس موضوع کے مختلف پہلوؤں پر مطالعات کیے ہیں۔ ان سے بنیادی طور پر درج ذیل نتائج سامنے آئے:
٭ بھارت میں تقریباً 2 سے 2.5 کروڑ افراد سِکل سیل جین کے حامل ہو سکتے ہیں ۔
٭ لاکھوں افراد اس بیماری کی فعال حالت میں مبتلا ہیں۔
٭ سب سے زیادہ اثر وسطی بھارت کے قبائلی علاقوں میں پایا جاتا ہے۔
٭ متعدد خاندان نسل در نسل اس بیماری سے متاثر رہے لیکن انہیں بیماری کے نام تک کا علم نہیں تھا۔
صدرجمہوریہ محترمہ مرمو نے کہا کہ مطالعات سے یہ بھی معلوم ہوا کہ بھارت کے قبائلی علاقوں میں سِکل سیل بیماری کا پھیلاؤ عام آبادی کے مقابلے میں کئی گنا زیادہ ہے۔ نتیجتاً ملک میں پہلی بار عوامی صحت، قبائلی فلاح، جینیاتی سائنس اور ڈیجیٹل نگرانی کو یکجا کرکے یہ ملک گیر مہم شروع کی گئی۔ ملک کی 17 ریاستوں میں چلائی جا رہی اس مہم میں ریاستوں نے بھی پوری سنجیدگی کے ساتھ شرکت کی ہے۔
صدرجمہوریہ نے کہا کہ اس مشن کا تصور مجھے بہت متاثر کرتا ہے۔ اسی لیے میں اس مشن کے تین اہم پہلوؤں کا ذکر کرنا چاہوں گی:
پہلا: وسیع پیمانے پر آگاہی پیدا کرنا اور شادی سے قبل جینیاتی مشاورت فراہم کرنا۔
دوسرا: جامع اسکریننگ کے ذریعے بروقت بیماری کی تشخیص کرنا۔
تیسرا: انتظامی جامعیت کو یقینی بناتے ہوئے صحت کی دیکھ بھال کے تسلسل کو برقرار رکھنا۔
صدرجمہوریہ محترمہ مرمو نے کہا کہ اگر عوامی صحت کے اقدامات کے تناظر میں دیکھا جائے تو ملک میں پہلی بار اتنی بڑی آبادی کی جینیاتی اسکریننگ ڈیجیٹل ٹریکنگ کے ساتھ کی جا رہی ہے۔ مشن موڈ میں کی گئی اسکریننگ کا ہی نتیجہ ہے کہ اب تک تقریباً ڈھائی لاکھ افراد میں سِکل سیل سے متعلق بیماری کی نشاندہی ہو چکی ہے اور اس بیماری کے 20 لاکھ سے زیادہ حاملین یعنی کیریئرز کی بھی شناخت کی جا چکی ہے۔ حاملین کی اتنی بڑی تعداد سے وابستہ چیلنج کو سمجھنے کی ضرورت ہے۔ سِکل سیل کے حامل افراد میں اس بیماری کی علامات ظاہر نہیں ہوتیں، اس لیے انہیں مستقبل میں اس کی سنگینی کا اندازہ نہیں ہو پاتا۔ اکثر حاملین کو یہ معلوم نہیں ہوتا کہ وہ غیر ارادی طور پر اپنی اولاد کو یہ بیماری منتقل کر سکتے ہیں۔ اطمینان کی بات ہے کہ مرکزی حکومت اور ریاستی حکومتوں نے گزشتہ چند برسوں میں مشن موڈ میں سِکل سیل سے متاثرہ مریضوں اور حاملین کی شناخت کے ساتھ ساتھ ان کی مناسب صحت نگہداشت کے لیے بھی قابلِ ستائش کام کیا ہے۔
صدرجمہوریہ محترمہ مرمو نے کہا کہ میرے علم میں لایا گیا ہے کہ کثیر سطحی کوششوں کے تسلسل میں مدھیہ پردیش میں تمام متاثرہ افراد، حاملہ خواتین اور نوزائیدہ بچوں کے لیے پوائنٹ آف کیئر ٹیسٹ پر مبنی جانچ کی سہولت کو آیوشمان آروگیہ مندر کی سطح تک توسیع دی گئی ہے۔ گزشتہ سال 17 ستمبر سے 2 اکتوبر تک جاری رہنے والی “صحت مند خاتون، مضبوط خاندان مہم” کے تحت مدھیہ پردیش نے 4 لاکھ سے زائد خواتین کی سِکل سیل اسکریننگ کا ریکارڈ قائم کرکے اس مسئلے کے حل میں گراں قدر کردار ادا کیا ہے۔ مدھیہ پردیش میں بڑے پیمانے پر طلبہ کی سِکل سیل اسکریننگ کی جا رہی ہے۔ قبائلی طلبہ کو بھی مشاورت، علاج اور صحت کی خدمات سے جوڑا جا رہا ہے۔ دور دراز اور دشوار گزار قبائلی علاقوں میں موبائل میڈیکل یونٹ (MMU) کے ذریعے مسلسل اسکریننگ کی جا رہی ہے۔
صدرجمہوریہ محترمہ مرمو نے کہا کہ گزشتہ سال عالمی یومِ سِکل سیل کے موقع پر ریاست میں “سِکل متر” پہل کا آغاز کیا گیا تھا۔ اس کے تحت آگاہی بڑھانے، مریضوں کو معاونت فراہم کرنے اور انہیں سرکاری صحت خدمات سے جوڑنے کے لیے سرکاری و غیر سرکاری اداروں، رضاکار تنظیموں کے نمائندوں اور این سی سی کیڈٹس کو تربیت دی گئی ہے۔
ان بامقصد اقدامات کے لیے میں ریاست کے تمام سرکاری اور غیر سرکاری اداروں کو مبارکباد دیتی ہوں۔ مجھے یقین ہے کہ تمام ریاستوں کی مشترکہ طاقت اور فعال کردار کے ذریعے ہم سال 2047 سے بہت پہلے ہی ملک سے سِکل سیل سے متعلق بیماریوں کے خاتمے کے اپنے قومی ہدف میں ضرور کامیاب ہوں گے۔ ملک میں قبائلی برادری کی سب سے بڑی آبادی مدھیہ پردیش میں ہے۔ مجھے امید ہے کہ مدھیہ پردیش قبائلی ترقی کے میدان میں مزید کئی تاریخی کامیابیاں حاصل کرے گا۔
ڈیجیٹل اور جینیاتی کارڈ معاشرے کے لیے جنم کنڈلی کے مترادف ہیں: گورنر مسٹر پٹیل
گورنر مسٹر منگوبھائی پٹیل نے کہا کہ سِکل سیل کی بیماری صرف صحت کا مسئلہ نہیں بلکہ خاص طور پر قبائلی معاشرے کی سماجی اور معاشی ترقی سے جڑا ایک سنگین چیلنج ہے۔ انہوں نے کہا کہ وزیرِ اعظم مسٹر مودی کی قیادت میں سِکل سیل کے خاتمے کو قومی مشن کی شکل دی گئی ہے۔ وزیرِ اعظم مسٹر مودی نے سال 2023 میں شہڈول سے قومی سِکل سیل انیمیا خاتمہ مشن-2047 کا آغاز کیا تھا۔ مدھیہ پردیش میں اس مہم کو اعلیٰ ترین ترجیح کے ساتھ نافذ کیا جا رہا ہے۔
گورنر مسٹر پٹیل نے بتایا کہ مدھیہ پردیش میں اب تک ایک کروڑ 32 لاکھ سے زائد افراد کی اسکریننگ کی جا چکی ہے اور تقریباً 95 سے 96 فیصد کام مکمل ہو چکا ہے۔ آئندہ دو سے تین ماہ میں بقیہ کام بھی مکمل کر لیا جائے گا۔ انہوں نے کہا کہ اس مہم نے قبائلی علاقوں میں بیماری کے بارے میں آگاہی اور احتیاط بڑھانے میں اہم کردار ادا کیا ہے۔ گورنر مسٹر پٹیل نے بتایا کہ ریاست میں ایلوپیتھک علاج کے ساتھ آیورویدک ادویات کے استعمال پر بھی کام کیا جا رہا ہے اور اس کے ابتدائی نتائج مثبت رہے ہیں۔ انہوں نے سِکل سیل کے مریضوں سے اپیل کی کہ علاج میں دونوں طریقہ ہائے علاج کا مربوط استعمال کریں۔ انہوں نے ڈیجیٹل جینیاتی کارڈ کو ازدواجی رشتوں کے لیے اہم قرار دیتے ہوئے کہا کہ یہ جنم کنڈلی کی طرح مفید ہے اور شادی سے قبل اس کا موازنہ ضروری ہے۔ اس سے آنے والی نسلوں کو اس موروثی بیماری سے محفوظ رکھا جا سکے گا۔
سِکل سیل خاتمہ مشن محض ایک تقریب نہیں بلکہ آنے والی نسلوں کے محفوظ مستقبل کا عزم ہے: وزیرِ اعلیٰ ڈاکٹر یادو
وزیرِ اعلیٰ ڈاکٹر موہن یادو نے کہا کہ آدی شنکراچاریہ کی ریاضت گاہ اور عوامی رہنما ٹنٹیا ماما کی سرزمینِ عمل پر منعقد یہ پروگرام صرف ایک تقریب نہیں بلکہ آنے والی نسلوں کے محفوظ مستقبل کا عزم ہے۔ انہوں نے کہا کہ قومی سِکل سیل خاتمہ مشن کے ذریعے عوامی بیداری بڑھا کر اس سنگین بیماری کی روک تھام کے لیے ملک اور ریاست مل کر کام کر رہے ہیں۔ وزیرِ اعلیٰ نے کہا کہ یہ مہم آنے والی نسلوں کو سِکل سیل جیسی مہلک بیماری سے بچانے کی کوشش ہے۔ انہوں نے کہا کہ اس بیماری کے اثرات صرف ایک فرد تک محدود نہیں رہتے بلکہ پورا خاندان اور کئی نسلیں اس کی تکلیف برداشت کرتی ہیں۔ اس لیے اس کی روک تھام ہم سب کی مشترکہ ذمہ داری ہے۔
وزیرِ اعلیٰ ڈاکٹر یادو نے صدر محترمہ مرمو کی موجودگی کو باعثِ تحریک قرار دیتے ہوئے ان کا خیرمقدم کیا اور کہا کہ ان کی رفاقت میں یہ عزم مزید مضبوط ہوا ہے۔ انہوں نے وزیرِ اعظم مسٹر مودی کی جانب سے سال 2023 میں شہڈول سے شروع کیے گئے قومی سِکل سیل مشن کا ذکر کرتے ہوئے کہا کہ آج یہ مہم قومی سطح پر ایک عوامی تحریک کی شکل اختیار کر چکی ہے۔
وزیرِ اعلیٰ ڈاکٹر یادو نے بتایا کہ مدھیہ پردیش میں حاملہ خواتین کی شناخت کرکے انہیں مشاورت، جینیاتی کونسلنگ اور سِکل سیل کارڈ کی تقسیم جیسے کام تیزی سے انجام دیے جا رہے ہیں۔ انہوں نے کہا کہ ریاست میں 3700 سے زائد “سِکل متر” بھی عوامی آگاہی کی اس مہم میں فعال کردار ادا کر رہے ہیں۔ وزیرِ اعلیٰ ڈاکٹر یادو نے کہا کہ ریاستی حکومت صحت کی خدمات کو مسلسل مضبوط بنا رہی ہے۔ انہوں نے بتایا کہ جہاں پہلے ریاست میں صرف 5 میڈیکل کالج تھے، اب یہ تعداد بڑھ کر 32 تک پہنچ رہی ہے۔ آیورویدک طبی تعلیم میں بھی تیزی سے توسیع کی جا رہی ہے۔
وزیرِ اعلیٰ ڈاکٹر یادو نے قبائلی ترقی کے لیے حکومت کے عزم کا اعادہ کرتے ہوئے کہا کہ کھرگون میں انقلابی سورج ٹنٹیا ماما کے نام پر یونیورسٹی قائم کرکے ریاستی حکومت ترقی کے تمام پیمانوں پر آگے بڑھ رہی ہے۔ ویرانگنا رانی درگاوتی اور راجا بھبھوت سنگھ جیسے عظیم ہیروز کے نام پر کابینہ کے اجلاس منعقد کیے گئے ہیں۔ چھندواڑہ میں بادل بھوئی اور جبل پور میں راجا شنکر شاہ-رگھوناتھ شاہ میوزیم کا افتتاح کیا گیا ہے۔ ثقافتی ورثے کے تحفظ کے لیے قبائلی تہوار بھگوریا کو سرکاری تہوار کا درجہ دیا گیا ہے۔ طالبات کے ہاسٹلز کے نام بھی قبائلی ہیروز کے نام پر رکھے گئے ہیں۔ قبائلی بھائی بہنوں کی فلاح و بہبود اور ان کی ہمہ جہت ترقی حکومت کی ترجیح ہے۔ انہوں نے کہا کہ سِکل سیل کے خلاف یہ جنگ معاشرے کے ہر طبقے کی شمولیت سے ہی جیتی جا سکتی ہے۔ وزیرِ اعلیٰ ڈاکٹر یادو نے ماں نرمدا اور اونکاریشور مہاراج کی مقدس سرزمین پر عہد کرتے ہوئے کہا کہ جب تک سِکل سیل خاتمہ مہم مکمل طور پر کامیاب نہیں ہو جاتی، یہ مہم مسلسل جاری رہے گی۔ وزیرِ اعلیٰ ڈاکٹر یادو نے صدرجمہوریہ محترمہ دروپدی مرمو کی ریاست میں آمد پر ان کا شکریہ ادا کیا۔
نائب وزیرِ اعلیٰ، وزیرِ صحتِ عامہ و طبی تعلیم مسٹر راجیندر شکل نے کہا کہ مدھیہ پردیش نے سِکل سیل انیمیا خاتمہ مشن-2047 میں سب سے بہترین کارکردگی کا مظاہرہ کیا ہے۔ سِکل سیل کو جڑ سے ختم کرنے کے لیے وزیرِ اعظم مسٹر مودی نے سال 2023 میں شہڈول سے ایک مشن کا آغاز کیا تھا۔ گورنر مسٹر پٹیل کی کوششوں نے اس مہم کو مزید رفتار بخشی ہے۔ ریاست کے قبائلی اکثریتی اضلاع میں اب تک ایک کروڑ 32 لاکھ افراد کی اسکریننگ کی جا چکی ہے۔ سِکل سیل انیمیا کی اسکریننگ کے معاملے میں مدھیہ پردیش ملک کی صفِ اول کی ریاست ہے۔ وزیرِ اعلیٰ ڈاکٹر یادو کی قیادت میں ریاستی حکومت نے سال 2026 کے اختتام تک ایک کروڑ 60 لاکھ اسکریننگ کا ہدف مقرر کیا ہے۔ اب جنم کنڈلی سے پہلے سِکل سیل اسکریننگ کارڈ کا موازنہ کیا جانے لگا ہے۔ اس مقصد کے لیے پورے صوبے میں آگاہی مہم چلائی جا رہی ہے تاکہ کوئی بھی سِکل سیل کا حامل (کیریئر) نہ بنے۔
صدر محترمہ مرمو نے قومی سِکل سیل انیمیا خاتمہ مشن-2047 میں نمایاں کام کرنے والی گرام پنچایتوں کے نمائندوں اور افسران کو بھی اعزازات سے نوازا۔
صدرجمہوریہ محترمہ مرمو نے نمائش کا معائنہ کیا
ریاست میں جاری منصوبوں کو سراہا
صدرجمہوریہ محترمہ مرمو نے اونکاریشور میں قومی سِکل سیل انیمیا خاتمہ مشن-2047 کے تحت منعقد عالمی یومِ سِکل سیل 2026 کے ریاستی سطح کے پروگرام میں لگائی گئی نمائش کا معائنہ کیا۔ نمائش کے دوران صدر محترمہ مرمو نے سِکل سیل خاتمہ مشن-2047 کے تحت مدھیہ پردیش میں کیے جا رہے اقدامات، اختراعات اور عوامی آگاہی مہمات کے بارے میں معلومات حاصل کیں۔ انہوں نے سِکل سیل بیماری کی روک تھام، بروقت تشخیص، علاج اور متاثرہ خاندانوں تک صحت کی سہولیات پہنچانے کے لیے ریاستی حکومت کی جانب سے کی جانے والی کوششوں کو سراہا۔ اس موقع پر گورنر مسٹر پٹیل، وزیرِ اعلیٰ ڈاکٹر یادو، نائب وزیرِ اعلیٰ مسٹر راجندر شکلا، وزیرِ آیوش مسٹر اندر سنگھ پرمار، وزیرِ قبائلی امور کنور ڈاکٹر وجے شاہ، وزیرِ مملکت برائے مذہبی اوقاف (آزادانہ چارج) مسٹر دھرمیندر سنگھ لودھی، وزیرِ مملکت برائے صحتِ عامہ و طبی تعلیم مسٹر نریندر شیواجی پٹیل، رکنِ پارلیمان مسٹر گیانیشور پاٹل، اراکینِ اسمبلی، عوامی نمائندے، سینئر انتظامی افسران اور سِکل سیل خاتمہ مہم کے رضاکار موجود تھے۔
