لندن، 17 نومبر: سابق آئی پی ایل کمشنر للت مودی نے منگل کے روز لندن سے ایک بیان جاری کر کے واضح کیا ہے کہ انہوں نے قانونی کارروائی سے بچنے کے لیے نہیں بلکہ 2010 میں انڈرورلڈ سے جان کو لاحق خطرے کے پیشِ نظر ہندوستان چھوڑا تھا، کیونکہ ملک چھوڑنے سے تین روز قبل بغیر کسی پیشگی اطلاع کے ان کی پولیس سکیورٹی ہٹا دی گئی تھی۔ مودی نے دعویٰ کیا کہ اس وقت ان کے خلاف کوئی ایف آئی آر درج نہیں تھی اور 16 برس سے زائد عرصہ گزرنے کے باوجود ہندوستان کی کسی عدالت میں ان کے خلاف چارج شیٹ داخل نہیں ہوئی ہے، لہٰذا انہیں مفرور قرار دینا سراسر غلط ہے۔ انہوں نے کہا کہ انفورسمنٹ ڈائریکٹوریٹ (ای ڈی) کے کہنے پر ان کا ہندوستانی پاسپورٹ منسوخ کیا گیا تھا جسے 2014 میں دہلی ہائی کورٹ نے بحال کر دیا، جبکہ انٹرپول نے بھی تحریری طور پر تصدیق کی ہے کہ اس کے ریکارڈ میں ان کے خلاف کوئی مجرمانہ الرٹ یا نوٹس موجود نہیں ہے۔
برطانوی شہریت حاصل کرنے کے حوالے سے للت مودی نے بتایا کہ 15 ستمبر 2026 کو انہیں برطانیہ کی شہریت مل چکی ہے اور اس معاملے پر گمراہ کن و ہتک آمیز خبریں شائع کرنے والے ہندوستانی میڈیا اداروں کے خلاف وہ قانونی چارہ جوئی کریں گے۔ واضح رہے کہ مودی پر آئی پی ایل میں مالی بے ضابطگیوں، میڈیا رائٹس معاہدوں میں مبینہ کمیشن خوری، فرنچائزی نیلامی میں گڑبڑی اور زرمبادلہ قوانین کی خلاف ورزی کے الزامات عائد کیے گئے تھے، جس کے بعد سے وہ لندن کے مہنگے ترین علاقے بیلگراویا-چیلسی میں مقیم ہیں۔ دہلی کے معروف کاروباری خاندان سے تعلق رکھنے والے للت مودی اپنے دادا گجر مل مودی کے ذریعے 1933 میں قائم کردہ کمپنی مودی انٹرپرائزز کے چیئرمین و منیجنگ ڈائریکٹر ہیں اور رپورٹس کے مطابق ان کی مجموعی دولت کا تخمینہ 57 کروڑ ڈالر (تقریباً 4,555 کروڑ روپے) ہے۔









