اسلام آباد 26اکتوبر:شاداب خان نے اکیلے سنچری کے ساتھ پاکستان کو ہارا ہوا میچ جتا دیا۔ 241 رنز کے تعاقب میں پاکستان نے 154 رنز پر 9 وکٹیں گنوا دیں تھیں۔ اس کے بعد آٹھویں نمبر پر شاداب نے شاندار اننگز کھیل کر ٹیم کو فتح سے ہمکنار کیا۔ انہوں نے 96 گیندوں پر ناٹ آؤٹ 113 رنز کی اننگز کھیلی جس میں 13 چوکے اور 5 چھکے شامل تھے۔ انہیں 11 نمبر پرحارث رؤف نے بھرپور سپورٹ کیا۔ دونوں نے 10ویں وکٹ (80 گیندوں) کے لیے 89 رنز کی شراکت داری کی۔ یہ ون ڈے میں رن کے کامیاب تعاقب میں 10ویں وکٹ کے لیے سب سے زیادہ شراکت تھی۔یہ کارنامہ 25 اکتوبر کو ون ڈے سہ فریقی سیریز میں ہوا، جب پاکستان نے بظاہر ناممکن لگنے والے تعاقب کو مکمل کیا اور ایک وکٹ سے میچ جیت لیا، میچ بہت سنسنی خیز رہا۔ پہلے انگلینڈ کے بلے بازوں نے شاندار کھیل کا مظاہرہ کیا اور پھر، تعاقب میں، پاکستان کے نچلے آرڈر کے بلے بازوں نے شاندار کارکردگی کا مظاہرہ کرتے ہوئے فتح کو یقینی بنایا۔میچ میں پہلے بیٹنگ کرتے ہوئے انگلینڈ کی ٹیم 46.4 اوورز میں 241 رنز پر آل آؤٹ ہوگئی۔ اوپنر بین ڈکٹ نے 111 گیندوں پر 10 چوکوں اور 2 چھکوں کی مدد سے 105 رنز بنائے۔ پاکستان کی جانب سے کپتان شاہین آفریدی نے سب سے زیادہ 4 وکٹیں حاصل کیں۔ پاکستان نے 47.1 اوورز میں 9 وکٹوں پر 243 رنز بنا کر کامیابی حاصل کی۔تعاقب میں پاکستان کی شروعات خراب رہی۔ پہلی وکٹ 18 رنز پر، دوسری 27 رنز پر اور تیسری بلے باز کی 31 رنز پر گری۔ وکٹیں گرتی رہیں اور ایک موقع پر اسکور 9 وکٹوں پر 154 رنز تھا۔ ٹیم کو جیت کے لیے 88 رنز درکار تھے جبکہ صرف ایک وکٹ باقی تھی۔ شاداب خان کے ساتھ حارث رؤف کریز پر تھے، لیکن شاداب نے شاندار کارکردگی کا مظاہرہ کرتے ہوئے ٹیم کو فتح سے ہمکنار کرایا۔
