بھوپال 13اگست:وزیر اعلیٰ ڈاکٹر موہن یادو نے کہا کہ ملک کے نوجوانوں کو سیاست میں آ کر اپنی فعال شراکت داری کرنی ہوگی۔ نوجوان ڈاکٹر اور انجینئر بننے کے ساتھ سیاست میں آ کر جمہوریت کو مضبوط بنائیں۔ ملک کی آزادی کے لیے متعدد مجاہدین آزادی نے اپنی جانوں کی قربانی دی۔ نیتا جی سبھاش چندر بوس نے آئی سی ایس کا امتحان پاس کرنے کے بعد ملازمت ٹھکرا کر انگریزوں کو سخت جواب دیا تھا۔ وہ ملک کو غلامی کی زنجیروں سے آزاد کرانے کے لیے آزادی کی تحریک میں کود پڑے۔ ملک کے نوجوانوں کو جمہوریت، پارلیمانی روایت اور پالیسی سازی سے جوڑنے کی یہ پہل قابلِ تقلید ہے۔ ملک کا نوجوان ہندوستان کے مستقبل کے لیے غور و فکر کرنے بیٹھا ہے۔ یہ ایک خوشگوار احساس ہے۔ وزیر اعلیٰ ڈاکٹر یادو جمعرات کو اسمبلی عمارت واقع ودھان پریشد میں منعقدہ “سنسد یوتھ پارلیمنٹ 2026کی افتتاحی تقریب سے خطاب کر رہے تھے۔ وزیر اعلیٰ ڈاکٹر یادو، اسمبلی اسپیکر مسٹر نریندر سنگھ تومر اور دلیپ بلڈکون کے سی ایم ڈی مسٹر دلیپ سوریہ ونشی نے “سنسد یوتھ پارلیمنٹ 2026 کا چراغ روشن کر کے افتتاح کیا۔ پروگرام میں ملک بھر سے نوجوان شرکاء پارلیمانی طریقہ کار، جمہوری اقدار اور قومی اہمیت کے موضوعات پر پارلیمانی انداز میں تبادلہ خیال کریں گے۔ یہ پروگرام ساکار درشتی سوشل فاؤنڈیشن اور کیلیڈوہوپ ناگپور کی جانب سے منعقد کیا گیا۔ پروگرام کے آغاز میں مہمانوں کو انگ وسترم اور یادگاری نشان پیش کر کے ان کا استقبال کیا گیا۔
وزیر اعلیٰ ڈاکٹر یادو نے کہا کہ وزیر اعظم مسٹر نریندر مودی کی قیادت میں ہندوستان ” کثرت میں وحدت”، “سب کا ساتھ، سب کا وکاس، سب کا وشواس اور سب کا پریاس” اور ” جیو اور جینے دو” کے جذبے کے ساتھ آگے بڑھ رہا ہے۔ یہ صرف الفاظ سے ممکن نہیں ہو سکتا۔ اسے عملی شکل دینے کے لیے عزم و ارادے کی ضرورت ہے۔ ہمارے لیے رام چندر اور رحیم کے لیے حقوق یکساں ہیں۔ مدھیہ پردیش میں یکساں سول کوڈ (UCC) کے لیے بڑے پیمانے پر تجاویز لی گئیں۔ تمام اضلاع اور تمام مذاہب کے لوگوں نے اس سلسلے میں اپنی قیمتی تجاویز دیں۔ UCC کے سروے میں 76 فیصد مسلم خواتین نے یکساں سول کوڈ کی حمایت کی۔ مدھیہ پردیش ملک کی بڑی ریاستوں میں سرفہرست ہے، جس نے UCC نافذ کرنے کے لیے بل منظور کیا ہے۔
سناتن ثقافت میں مادرانہ نظام کو سب سے زیادہ اہمیت دی گئی ہے
وزیر اعلیٰ ڈاکٹر یادو نے کہا کہ مدھیہ پردیش ملک کا دل ہے اور ہندوستان دنیا کا سب سے نوجوان ملک ہے۔ “سنسد یوتھ پارلیمنٹ 2026” کے انعقاد میں 12 ریاستوں اور 58 شہروں کے نوجوانوں نے حصہ لیا ہے۔ ایوان فلاحی پالیسیوں کی تشکیل کرنے والی مقدس جگہ ہے۔ اس یوتھ پارلیمنٹ میں بیٹیوں کی فعال شرکت خواتین کو بااختیار بنانے کی مؤثر مثال ہے۔ سناتن ثقافت میں مادرانہ نظام کو سب سے زیادہ اہمیت دی گئی ہے۔ ہماری ثقافت میں “وسودھیو کٹمبکم” کا جذبہ شامل ہے۔ دنیا ہمارے لیے ایک خاندان کی طرح ہے۔ ماں خاندان کی بنیاد ہوتی ہے، ماں کے بغیر بھگوان بھی ادھورے ہیں۔ انہوں نے کہا کہ ہم سب عدلیہ کے فیصلوں کا حرف بہ حرف احترام کرتے ہیں۔ سپریم کورٹ کے فیصلے کے بعد ایودھیا میں شاندار مندر تعمیر ہو سکا ہے۔
