نوئیڈا30جولائی: دہلی کے جنتر منتر پر احتجاج کے دوران وزیر اعظم نریندر مودی کے خلاف نازیبا اور توہین آمیز تبصرہ کرنے والی خاتون کے خلاف قانونی کارروائی کی گئی ہے۔ گوتم بدھ نگر کمشنریٹ کے ایکسپریس وے پولیس اسٹیشن میں سوشل میڈیا پر وائرل ہونے والے ایک ویڈیو میں نظر آنے والی ملزم روچیکا سنگھ کے خلاف زیرو ایف آئی آر درج کی گئی ہے۔ اس معاملے میں شکایت اندرا پورم (وسندھرا)، غازی آباد کی رہنے والی ا سمرتی سنگھ نے درج کرائی ہے۔ اپنے تحریری بیان میں، انہوں نے پولیس کو بتایا کہ جمعرات 23 جولائی 2026 کو نئی دہلی کے جنتر منتر پر ایک مظاہرہ ہوا۔ اس مظاہرے کے دوران ملزم روچیکا سنگھ نے سرعام ہندوستان کے وزیر اعظم کے خلاف انتہائی نازیبا اور جارحانہ زبان استعمال کی۔
شکایت میں کہا گیا ہے کہ خاتون کے اقدامات سے نہ صرف وزیراعظم کے اعلیٰ ترین آئینی عہدے کے وقار کو شدید نقصان پہنچا بلکہ یہ بیان نفرت پھیلانے اور عوامی امن کو خراب کرنے کے مذموم ارادے سے دیا گیا تھا۔ پولیس کی طرف سے درج ایف آئی آر کے مطابق، ملزم خاتون کی شناخت روچیکا سنگھ کے طور پر کی گئی ہے، جو اس وقت نوئیڈا کے سیکٹر 168 کے ایکسپریس وے تھانہ علاقے میں لوٹس زنگ سوسائٹی کے ٹاور 6 میں رہتی ہے۔ ایکسپریس وے پولیس اسٹیشن کے انچارج امیت کمار کھاری کی ہدایت پر پولیس نے 29 جولائی 2026 کو شام 6 بجکر 19 منٹ پر مقدمہ درج کیا۔ معاملے کی سنگینی کو دیکھتے ہوئے BNS، 2023 کے تحت درج ذیل دفعات میں مقدمہ درج کیا گیا ہے۔
