بھوپال:25؍اپریل:مدھیہ پردیش حکومت کے محکمہ تعمیراتِ عامہ کے وزیر مسٹر راکیش سنگھ نے ہفتہ کے روز بڑوانی ضلع کے دورے کے دوران مختلف سڑک اور پل تعمیراتی منصوبوں کا افتتاح اور سنگِ بنیاد رکھا۔ سیلاود میں مقامی شہریوں کی جانب سے کیے گئے پرتپاک استقبال پر انہوں نے شکریہ ادا کرتے ہوئے کہا کہ ان ترقیاتی کاموں سے علاقے میں طویل عرصے سے محسوس کی جا رہی بنیادی سہولتوں کی کمی اب دور ہو رہی ہے۔ وزیر مسٹر سنگھ نے کہا کہ ملک کے وزیر اعظم مسٹر نریندر مودی کی رہنمائی اور وزیر اعلیٰ ڈاکٹر موہن یادو کی قیادت میں ریاست میں بنیادی ڈھانچے کی ترقی کو نئی سمت ملی ہے اور منصوبوں کا فائدہ آخری فرد تک پہنچ رہا ہے۔وزیر مسٹر سنگھ نے بتایا کہ سیلاود-ہولگاؤں راستے پر گوئی ندی پر پل کی تعمیر (1039.88 لاکھ)، سیندھوا-بلواری روڈ برج کے پاس 1 کلومیٹر سروس روڈ کی تعمیر (253.38 لاکھ) اور دوندوڑا سے مالکاتر راستہ (4 کلومیٹر) کی تعمیر (510.56 لاکھ) جیسے کاموں سے علاقے میں آمد و رفت آسان ہوگی اور تقریباً 5 کلومیٹر کا فاصلہ کم ہو جائے گا۔ ان تمام کاموں پر کل تقریباً 18 کروڑ روپے لاگت آئے گی۔وزیر مسٹر سنگھ نے کہا کہ سڑک اور پل صرف تعمیراتی کام نہیں بلکہ تعلیم، صحت اور روزگار کے مواقع کو عوام تک پہنچانے کا ذریعہ ہیں۔ انہوں نے بتایا کہ علاقے میں 19 کلومیٹر طویل ٹو-لین سڑک کی تعمیر بھی تجویز ہے، جس کی لاگت تقریباً 38 کروڑ روپے ہے۔ اس وقت بڑوانی ضلع میں سیکڑوں کروڑ روپے کے ترقیاتی کام جاری ہیں۔ انہوں نے کہا کہ حکومت کا مقصد صرف تعمیرات نہیں بلکہ معیاری اور پائیدار بنیادی ڈھانچے کی ترقی ہے۔ قبائلی علاقوں سمیت تمام طبقات تک ترقی کی رسائی یقینی بنائی جا رہی ہے۔
وزیر مسٹر سنگھ نے مختلف عوامی فلاحی منصوبوں کا ذکر کرتے ہوئے کہا کہ رہائش، صحت، گیس کنکشن اور خواتین کو بااختیار بنانے سے متعلق اسکیموں نے عوام کی زندگی کے معیار میں نمایاں بہتری لائی ہے۔ اس پروگرام میں راجیہ سبھا کے رکن ڈاکٹر سْمیر سنگھ سولنکی، رکن پارلیمنٹ مسٹر گجیندر پٹیل، رکن اسمبلی مسٹر شیام بردے، سابق وزیر مسٹر پریم سنگھ پٹیل سمیت دیگر عوامی نمائندے اور بڑی تعداد میں مقامی شہری موجود تھے۔
