سلہٹ، 13 نومبر (یو این آئی) بنگلہ دیش نے محمود الحسن (171) اور کپتان نجم الحسن شانتو کی شاندار بلے بازی کے بعد گیند بازوں کی نپی تلی کارکردگی کی بدولت پہلے ٹیسٹ کے تیسرے دن اسٹمپس تک آئرلینڈ کی دوسری اننگز میں صرف 86 رنز پر پانچ وکٹیں گرا کر جیت کی راہ ہموار کر لی۔ بنگلہ دیش نے ایک وکٹ پر 338 رنز سے اپنی اننگز آگے بڑھائی۔ صبح کے سیشن میں بیری میکارتھی نے ڈبل سنچری کی جانب بڑھتے محمود الحسن کو آؤٹ کر کے آئرلینڈ کو پہلی کامیابی دلائی۔ محمود الحسن نے 286 گیندوں پر 14 چوکوں اور چار چھکوں کی مدد سے 171 رنز بنائے۔ اسی دوران 89ویں اوور میں میکارتھی نے مومن الحق (82) کو بھی پویلین بھیج دیا۔مشفق الرحیم نے 23 اور لٹن داس نے 60 رنز بنائے، دونوں کو میتھیو ہمفریز نے آؤٹ کیا۔ کپتان نجم الحسن شانتو نے 114 گیندوں پر 14 چوکوں کی مدد سے شاندار سنچری مکمل کی، تاہم انہیں اینڈی میکبرائن نے قابو کیا۔ مہدی حسن مرزا نے 17 اور حسن مراد نے 16 رنز جوڑے۔ بنگلہ دیش نے 141 اوور میں آٹھ وکٹوں پر 587 رنز بنا کر 301 رنز کی برتری کے ساتھ اننگز ڈکلیئر کر دی۔آئرلینڈ کی جانب سے میتھیو ہمفریز نے شاندار بولنگ کرتے ہوئے پانچ وکٹیں حاصل کیں، بیری میکارتھی نے دو جبکہ اینڈی میکبرائن نے ایک کھلاڑی کو آؤٹ کیا۔جواب میں بلے بازی کے لیے اتری آئرش ٹیم کی شروعات مایوس کن رہی۔ صرف چوتھے اوور میں کیڈ کارمیکل (5) آؤٹ ہو گئے۔ اس کے بعد ہیری ٹیکٹر اور پال اسٹرلنگ نے دوسرے وکٹ کے لیے 47 رنز کی شراکت قائم کی، لیکن 18ویں اوور میں پال اسٹرلنگ (43) رن آؤٹ ہو گئے۔ ہیری ٹیکٹر (18)، کرٹس کیمفر (5) اور لارکن ٹکر (9) بھی زیادہ دیر وکٹ پر نہ رک سکے۔
دن کے اختتام پر آئرلینڈ نے 29 اوور میں پانچ وکٹوں کے نقصان پر 86 رنز بنائے اور وہ اب بھی بنگلہ دیش کے پہلی اننگز کے اسکور سے 215 رنز پیچھے ہے۔بنگلہ دیش کے لیے حسن مراد نے دو، جبکہ ناہید رانا اور تیج الاسلام نے ایک ایک وکٹ حاصل کی۔
