چانگ زو (چین)، 25 جولائی (یو این آئی) ستوک سائراج رینکیریڈی اور چراغ شیٹی نے جمعہ کو ملائیشیا کے یو سن اونگ اور ای یی تیو کو سیدھے گیمز میں شکست دے کر بی ڈبلیو ایف سپر 1000 چائنا اوپن 2025 کے مردوں کے ڈبلز سیمی فائنل میں داخلہ لیا۔
ہندوستانی جوڑی نے اولمپک اسپورٹس سینٹر جمنازیم میں شاندار کارکردگی کا مظاہرہ کیا اور صرف 40 منٹ میں 21-18، 21-14 سے میچ جیت لیا۔ ہندوستان، سنگاپور اور ملائیشیا اوپن میں شاندار کارکردگی کے بعد یہ اس سیزن میں ان کا چوتھا سیمی فائنل ہے۔پہلے گیم میں شاندار آغاز کے بعد ساتوک اور چراغ نے ملائیشین جوڑی کی ابتدائی برتری کو روک کر گیم 21-18 سے جیت لیا۔ دوسرے گیم میں انہوں نے 15-14 کی برتری کو توڑا اور چھ پوائنٹس حاصل کرکے فتح پر مہر ثبت کی۔اب ان کا مقابلہ عالمی نمبر 2 آرون چیا اور ملائیشیا کے سوہ ووئی یک سے ہوگا، وہی جوڑی جس نے انہیں پیرس 2024 اولمپکس کے کوارٹر فائنل میں ناک آؤٹ کیا تھا۔
اس سے قبل چائنا اوپن 2025 میں انتی ہڈا کی شاندار دوڑ خواتین کے سنگلز کوارٹر فائنل میں جاپان کی اکانے یاماگوچی کے ہاتھوں شکست کے ساتھ ختم ہوگئی۔عالمی نمبر 4 نے ہندوستانی نوجوان کو 21-16، 21-12 سے شکست دے کر سیمی فائنل میں داخلہ لیا۔اپنے پہلے ہی بی ڈبلیو ایف سپر 1000 ایونٹ میں کھیلتے ہوئے 17 سالہ اننتی نے اپنی بے خوف کارکردگی سے سرخیوں میں جگہ بنائی اور بی ڈبلیو ایف سپر 1000 ایونٹ کے کوارٹر فائنل میں پہنچنے والی صرف چوتھی ہندوستانی خواتین کی سنگلز شٹلر بن گئیں۔
اننتی نے جمعرات کو شاندار کارکردگی کا مظاہرہ کرتے ہوئے دو بار کی اولمپک میڈلسٹ پی وی سندھو کو شکست دے کر چائنا اوپن 2025 کے خواتین کے سنگلز کوارٹر فائنل میں داخلہ لیا تھا۔
