نئی دہلی15فروری: سوشل میڈیا پر ایک ویڈیو وائرل ہو رہی ہے جس میں دیکھا جا سکتا ہے کہ لوگ دہلی میٹرو کے ایک اسٹیشن پر ایگزٹ گیٹ پھلانگ کر باہر نکل رہے ہیں۔ تحقیقات کے بعد معلوم ہوا کہ یہ واقعہ 13 فروری 2025 کو رات 11 بجکر 22 منٹ پر جامع مسجد میٹرو اسٹیشن پر پیش آیا۔ دہلی میٹرو ریل کارپوریشن (ڈی ایم آر سی) کے مطابق، اس رات شبِ برات کی وجہ سے میٹرو اسٹیشن پر غیر معمولی بھیڑ تھی۔ اسی دوران تقریباً 11:22 پر دو ٹرینیں ایک ساتھ پہنچ گئیں، جس کے سبب ایگزٹ گیٹ پر مسافروں کا دباؤ بڑھ گیا۔ رش کی وجہ سے خودکار ایگزٹ گیٹ نے کام کرنا بند کر دیا، جس پر مسافروں کو متبادل راستے سے نکلنے کی اجازت دی گئی۔ ایگزٹ گیٹ کے بند ہونے پر کچھ مسافروں نے بے صبری کا مظاہرہ کرتے ہوئے گیٹ پھلانگ کر باہر نکلنا شروع کر دیا۔ ویڈیو میں کچھ افراد کو ایسا کرتے ہوئے دیکھا جا سکتا ہے۔ تاہم، کچھ دیر بعد بھیڑ منتشر ہو گئی اور کسی قسم کی باضابطہ شکایت درج نہیں کی گئی۔ ذرائع کا کہنا ہے کہ سوشل میڈیا پر وائرل ہونے والی ویڈیو میں کچھ ترمیم بھی کی گئی ہے، جس میں میٹرو کی آواز اور پسِ منظر میں موسیقی شامل کی گئی ہے۔ تاہم، واقعے کی بنیادی تفصیلات درست ہیں۔ ڈی ایم آر سی کے کارپوریٹ کمیونیکیشن کے چیف ایگزیکٹو ڈائریکٹر، انوج دیال نے کہا کہ جامع مسجد میٹرو اسٹیشن پر چند مسافروں نے اے ایف سی (آٹومیٹڈ فیئر کلیکشن) گیٹ کو عبور کر کے باہر نکلنے کی کوشش کی تھی۔ انہوں نے مزید کہا کہ یہ ایک وقتی صورتحال تھی جو اچانک بڑھی ہوئی بھیڑ کی وجہ سے پیدا ہوئی تھی، لیکن سکیورٹی اہلکار اور دیگر عملہ وہاں موجود تھا اور حالات مکمل طور پر قابو میں رہے۔ ڈی ایم آر سی نے مسافروں کو مشورہ دیا کہ وہ میٹرو کے قوانین پر عمل کریں اور نظم و ضبط برقرار رکھیں۔ دہلی پولیس کی میٹرو ونگ کا کہنا ہے کہ اس واقعے کے حوالے سے ابھی تک کوئی شکایت موصول نہیں ہوئی ہے، لیکن اگر شکایت درج کرائی جاتی ہے تو قانونی کارروائی پر غور کیا جائے گا۔ یہ واقعہ سوشل میڈیا پر بحث کا باعث بن گیا ہے، جہاں کچھ صارفین نے بھیڑ کے دباؤ کو جواز دیا ہے، جبکہ کچھ نے میٹرو حکام پر ایگزٹ گیٹ کے موثر انتظام میں ناکامی کا الزام عائد کیا ہے۔
عقیدت مندوں سے بھری بس پلٹی، ایک کی موت
غازی پور:15فروری(یواین آئی) اترپردیش کے ضلع غازی پور میں ہفتہ کی صبح نیپال سے پریاگ راج جارہی عقیدت مندوں سے بھری ایک بس کے پلٹ جانے سے اس میں سوار ایک مسافر کی موت ہوگئی جبکہ دیگر 12افراد زخمی ہوگئے۔
