بھوپال، 5 مارچ (رپورٹر) وزیر اعلیٰ ڈاکٹر موہن یادو نے منگل کو بھوپال کے لال پریڈ گراؤنڈ میں 21 محکموں کے 8837 نوجوانوں کو تقرری خط تقسیم کئے۔ اس میں علامت کے طور پر انہوں نے اسٹیج پر ہی 17 تقرری نامے پیش کئے۔ بھوپال میٹرو کے دوسرے مرحلے کے لیے آٹھ اسٹیشنوں کی تعمیر کے لیے بھومی پوجن بھی کیا۔ شہری اداروں کے ترقیاتی کاموں کے لیے 1000 کروڑ روپے کی رقم منتقل کی گئی۔ ریاست میں ریلوے کراسنگ کو ختم کرنے کے لیے 334 پلوں کی تعمیر کے ساتھ ساتھ 105 ریلوے اوور برجوں کی تعمیر کا عمل بھی شروع کیا گیا۔
وزیر اعلیٰ ڈاکٹر موہن یادو نے پروگرام سے خطاب کرتے ہوئے کہا کہ پٹواری امتحان میں شرکت کرنے والے نوجوانوں کی جدوجہد بڑی ہے۔ تحقیقات کے نام پر نوجوانوں کو روکنا بی جے پی کو منظور نہیں ہے۔ اگر غلط ہوا تو ہم ایکشن لیں گے۔ نوجوانوں کو تقرری نامہ دیتے ہوئے وزیر اعلیٰ نے کہا کہ اب ان کی زندگی ایک نئی شروعات کے ساتھ آگے بڑھ رہی ہے۔ اس سے بڑی بات کیا ہو سکتی ہے۔ انہوں نے کہا کہ ہم ایک ہفتے میں 15 ہزار امیدواروں کو تقرری نامے فراہم کرنے جا رہے ہیں۔ یہ ایک منی کمبھ کی طرح ہے، جس میں مختلف قسم کے فائدہ اٹھانے والوں، سرکاری ملازمین اور اداروں کو انعام دیا جا رہا ہے۔
پروگرام سے خطاب کرتے ہوئے وزیر اعلیٰ نے کانگریس پر بڑا حملہ کیا۔ انہوں نے کہا کہ انہوں نے ایودھیا میں رام مندر کے لیے 500 سال تک جدوجہد کی۔ کانگریس نے بھی اس نیک کام میں رکاوٹیں کھڑی کیں۔ کانگریس قائدین نے رام للا کے پران پرتشٹھا پروگرام کے لئے دعوت نامے کو ٹھکرا دیا۔ یہ ہمارے عقیدے کے مرکز بھگوان شری رام کی توہین ہے۔ انہوں نے کہا کہ عوام اس توہین کو ہرگز برداشت نہیں کریں گے۔ یہ جواب عوام آنے والے وقت میں کانگریس کو دیں گے۔
وزیر اعلیٰ ڈاکٹر یادو نے شہری اداروں کے ترقیاتی کاموں کے لیے 1000 کروڑ روپے کی رقم منتقل کی۔ اس موقع پر بھوپال میٹرو پروجیکٹ کے دوسرے مرحلے کے 8 اسٹیشنوں کا بھومی پوجن بھی کیا گیا۔ ڈاکٹر یادو نے کہا کہ ایک وقت تھا جب میٹرو ٹرین ریاست کے لوگوں کے لیے ایک خواب تھا۔ بھوپال اور اندور کے بعد جبلپور، گوالیار اور ریاست کے دیگر بڑے شہروں میں میٹرو ریل لائنیں تعمیر کرنے کا منصوبہ ہے۔ ریاست میں ریلوے کراسنگ کو ختم کرنے کے لیے105ریلوے اوور برج تعمیر کے ساتھ ہی 334پلوں کی تعمیر کی کارروائی شروع کی گئی ہے ۔
وزیر اعلیٰ ڈاکٹر یادو نے پروگرام میں ’’سوچھ ہم‘‘ کتابچہ اور ’’سیوریج مینجمنٹ پالیسی 2024‘‘ کا بھی اجراء کیا۔ یہ پروگرام ریاست کے تمام 413 شہری اداروں میں براہ راست نشر کیا گیا۔
(باقی صفحہ 7 پر)
وزیر اعلیٰ ڈاکٹر یادو نے ریموٹ کا بٹن دبا کر 8 ہزار 837 نئے تعینات ہونے والے ملازمین میں تقرری نامہ تقسیم کئے۔ علامت کے طور پر انہوں نے اسٹیج پر 17 تقرری نامہ فراہم کئے۔
وزیر اعلیٰ ڈاکٹر یادو نے کہا کہ وزیر اعظم مودی نے لال قلعہ سے اپنے خطاب میں ملک کے شہریوں سے صفائی مہم میں حصہ لینے کی اپیل کی تھی۔ صفائی مہم کے تحت پورا ملک شہروں، قصبوں اور گائووںمیں مثالیں قائم کر رہا ہے۔ مدھیہ پردیش کو صفائی کے شعبے میں ایک رہنما ہونے کا اعزاز حاصل ہے۔ جہاں اندور شہر کو 7ویں بار سب سے صاف شہر منتخب کیا گیا ہے، وہیں بھوپال کو صاف ستھرے دارالحکومت کے طور پر منتخب کیاگیا ہے۔ بھوپال ملک کا 5واں صاف ستھرا شہر بھی ہے۔ وزیر اعلیٰ ڈاکٹر یادو نے ایوارڈ یافتہ اداروں کو مبارکباد دیتے ہوئے امید ظاہر کی کہ وہ مستقبل میں بھی صفائی کے شعبے میں بہتر نتائج دیں گے۔
وزیر اعلیٰ ڈاکٹر یادو نے کہا کہ وزیر اعظم مودی جی کی قیادت میں ملک تمام شعبوں میں ترقی کی جانب گامزن ہے۔ ریاستی حکومت بھی ترقی کے تمام شعبوں میں کام کرنے کے لیے پرعزم ہے۔ اس کے ساتھ حکومت سے وابستہ چھوٹے سے چھوٹے ملازم کی عزت کے لیے بھی حکومت سنجیدہ ہے۔ پروگرام کے تحت 8 ہزار 837 نوجوانوں کو ملازمت کے لیے تقرری خط فراہم کیے جا رہے ہیں۔ آنے والے ہفتے میں مزید 15 ہزار اپائنٹمنٹ لیٹر سونپے جائیں گے۔ ان سب کے لیے آج کا دن مبارک ہے۔ ذریعہ معاش تلاش کرنے سے بہتر کوئی کام نہیں۔ وزیر اعلیٰ ڈاکٹر یادو نے نئے تعینات ہونے والے افسران اور ملازمین کو مبارکباد دی۔
وزیر شہری انتظامیہ اور رہائشات مسٹرکیلاش وجے ورگیہ نے کہا کہ شہری اداروں سے وابستہ عوامی نمائندے اہم کردار ادا کرتے ہیں۔ شہروں میں شہریوں کو کونسلرز سے سب سے زیادہ توقعات ہوتی ہیں، یہ بھی فطری ہے۔ اندور اور ریاست کے دیگر شہروں کو حکومت ہند نے سوچھ سرویکشن میں ان کے اچھے کام کے لیے منتخب کیا تھا۔ اس کے ساتھ زونل ایوارڈ کے تحت مختلف اداروں کی حوصلہ افزائی کی جا رہی ہے۔
وزیر اعلیٰ ڈاکٹر یادو نے ملک کے سب سے صاف ستھرے شہر اندور کے میئر شری پشیا مترا بھارگو کو صفائی ایوارڈ پیش کیا۔ اس کے ساتھ ہی بھوپال کی میئر شریمتی مالتی رائے نے بہترین صاف دارالحکومت کا ایوارڈ حاصل کیا۔ اس کے علاوہ صفائی کے شعبے میں مختلف زمروں میں ایوارڈز کے لیے منتخب شہری اداروں کے عہدیداروں کو بھی انعامات سے نوازا گیا، اجین، سونسر، منگاوالی، نوروز آباد، امرکنٹک، بدھنی، بدناور، ودیشہ، شاجاپور اور کھنڈوا،47 شہری اداروں، 4 ڈویزنوں، 3 اضلاع، مدھیہ پردیش بطور ریاست اور ایک ایس بی ایم ٹیم کو کل 65 ایوارڈز دیے گئے۔ مرکزی حکومت کے سوچھ سرویکشن-2023 اور سٹی بیوٹی مقابلہ کے مختلف اجزاء میں بہترین کارکردگی کا مظاہرہ کرنے والے شہری اداروں کو پروگرام میں اعزاز سے نوازا گیا۔ کمشنرز، چیف میونسپل آفیسرس، صفائی نوڈل، صفائی دوست، شہری اداروں کے فرنٹ لائن ورکرز وغیرہ نے شرکت کی۔ قابل ذکر ہے کہ پچھلے مہینے سوچھ سرویکشن-2023 کے نتائج کا اعلان حکومت ہند کی ہاؤسنگ اور شہری امور کی وزارت نے کیا تھا۔ اس میں ریاست اور ریاست کے شہری اداروں کو قومی سطح پر سوچھ سرویکشن-2023 اور سٹی بیوٹی مقابلہ میں مختلف زمروں میں اعزاز سے نوازا گیا ہے۔
پروگرام میں وزیر اعلیٰ ڈاکٹر یادو نے اسٹاف سلیکشن بورڈ سے منتخب افسران اور ملازمین کو تقرری خط پیش کئے۔ کل 8 ہزار 837 تقرریاں دی گئی ہیں۔ آج صحت عامہ اور طبی تعلیم، زراعت، پنچایت اور دیہی ترقی، حیوانات اور ڈیری، آیوش، مائیکرو، چھوٹے اور درمیانے درجے کے کاروباری اداروں، محنت، خواتین اور بچوں کی ترقی، شہری ترقی اور ہاؤسنگ، سماجی انصاف اور معذوروں کی بہبود، بھوپال گیس المیہ راحت اور بازآبادکاری، پبلک ورکس ڈیپارٹمنٹ، ہارٹیکلچر اینڈ فوڈ پروسیسنگ، ٹیکنیکل ایجوکیشن، اسکل ڈیولپمنٹ اینڈ ایمپلائمنٹ، جنرل ایڈمنسٹریشن، رابطہ عامہ ، کمرشل ٹیکس اور قبائلی امور کے محکموں میں مختلف آسامیوں پر تعینات افسران اور ملازمین کو تقرری کے خطوط دیے گئے۔
