جبل پور، 16 مارچ (رپورٹر) ریلوے کی ملینیم کالونی میں ریلوے افسر اور ان کے بیٹے کے قتل کے معاملے میں پولیس کو تفتیش کا نیا زاویہ مل گیا ہے۔ شبہ ظاہر کیا جا رہا تھا کہ قاتل کے ساتھ بیٹی بھی شامل ہے۔ پولیس کو اس کی تصدیق اس وقت ہوئی جب سی سی ٹی وی میں مقتول کی بیٹی کو ایکٹیوا میں قاتل کے ساتھ جاتے ہوئے دیکھا گیا۔
پولیس نے واردات کی تفصیلی جانچ کے لیے آس پاس کے سی سی ٹی وی کیمروں کی تلاشی لی تو پولیس کو کئی سراغ ملے۔ بیٹی کو قاتل کے ساتھ دیکھ کر پولیس بھی حیران رہ گئی۔ باپ بیٹے کو قتل کرنے کے بعد فرار ہونے والے جوڑے نے پولیس کو چکمہ دینے کے لیے اپنی ایکٹیوا مدن محل ریلوے اسٹیشن کے باہر کھڑی کی اور وہاں سے آٹو میں سوار ہوکر دین دیال کے بین ریاستی بس اسٹینڈ پہنچے۔ جہاں سے وہ ایک بس میں فرار ہو گئے۔
خیال کیا جا رہا ہے کہ جس بس میں یہ جوڑا بیٹھا تھا وہ ساگر دموہ کی طرف جا رہی تھی۔ پولیس نے تفتیش کے لیے اپنی کارروائی شروع کر دی ہے۔ پولیس پہلے مدن محل اسٹیشن اور پھر آئی ایس بی ٹی پہنچی۔ جہاں لوگوں سے پوچھ گچھ کی گئی۔
قابل ذکر ہے کہ ریلوے افسر راج کمار وشوکرما اپنے 8 سالہ بیٹے تنشک اور 16 سالہ نابالغ بیٹی کے ساتھ ملینیم کالونی میں رہتے تھے۔ جمعہ کی صبح بیٹی نے ہوشنگ آباد میں رہنے والے اپنے چچا کو واٹس ایپ پر وائس میسیج کے ذریعے بتایا تھا کہ پڑوس میں رہنے والے مکل سنگھ نے اس کے والد اور بھائی کا قتل کردیا ہے۔ دوہرے قتل کو انجام دینے والا ملزم مکل سنگھ جبل پور ریلوے ڈویژن میں تعینات سیفٹی او ایس راجپال سنگھ کا بیٹا ہے۔
پولیس نے مکل سنگھ کے بڑے بھائی کو گرفتار کر لیا ہے جس سے تفصیل سے پوچھ گچھ کی جا رہی ہے۔ پولیس کی تفتیش کے دوران یہ بات سامنے آئی کہ سی سی ٹی وی میں نابالغ بیٹی کو قاتل کے ساتھ گھومتے ہوئے دیکھا گیا۔ وہ سب سے پہلے اپنے کوارٹر سے دودھ لینے نکلی۔ اس کے بعد 12:30 بجے وہ قتل کے ملزم کے ساتھ ایکٹیوا میں باہر نکلی۔ پولیس کو شبہ ہے کہ ریلوے افسر راج کمار اور ان کے بیٹے کو آدھی رات کے بعد سوتے ہوئے قتل کیا گیا تھا۔ ادھر پولیس سپرنٹنڈنٹ آدتیہ پرتاپ سنگھ کا کہنا ہے کہ اس دوہرے قتل میں قتل کے ملزم مکل اور نابالغ بیٹی دونوں لاپتہ ہیں۔ پولیس کی کئی ٹیمیں اس کی تلاش میں مصروف ہیں، فی الحال متوفی کے گھر کو سیل کردیا گیا ہے۔ معاملہ کچھ بھی ہو، قتل کے اس سنسنی خیز کیس نے لوگوں کو تشویش میں ڈال دیا ہے۔
