کولمبو:13؍فروری :ٹی-20 ورلڈ کپ میں پہلا اُلٹ پھیر دیکھنے کو ملا ہے۔ زمبابوے نے آسٹریلیا کو 23 رنز کے فرق سے ہرایا۔ ٹیم نے دوسری بار آسٹریلیا کو ٹی-20 ورلڈ کپ میں شکست دی ہے۔ اس نے 19 سال پہلے 2007 میں بھی آسٹریلوی ٹیم کو لیگ راؤنڈ میں ہرایا تھا۔تاشنگا موسیکیوَا نے مارکس اسٹوئنس کا شاندار ڈائیونگ کیچ پکڑا۔ اسٹوئنس 6 رنز بنا کر آؤٹ ہوئے اورکنگارو ٹیم رن چیس میں بکھر گئی۔کولمبو کے پریم داسا اسٹیڈیم میں آسٹریلیا نے ٹاس جیت کر پہلے بولنگ کا فیصلہ کیا۔ زمبابوے نے 20 اوور میں 2 وکٹ کے نقصان پر 169 رنز بنائے۔ جواب میں آسٹریلیا 19.3 اوور کے بعد 146 رنز پر آل آؤٹ ہو گئی۔ بلیسنگ مزاربانی نے 4 وکٹ حاصل کیے۔ انہیں پلیئر آف دی میچ منتخب کیا گیا۔
ہدف کا تعاقب کر رہے میٹ رینشا (65 رنز) نے نصف سنچری اسکور کی۔ گلین میکسویل نے 31 رنز بنائے۔ مارکس اسٹوئنس (6)، ٹریوس ہیڈ (17) اور جوش انگلس (8) خاص کارکردگی نہ دکھا سکے۔ ٹم ڈیوڈ اور کیمرون گرین کا کھاتا بھی نہ کھل سکا۔ زمبابوے کی جانب سے مزاربانی کے علاوہ ایونز نے 3 وکٹ حاصل کیے۔
