راج گڑھ :25؍جولائی :راج گڑھ کے کھجنیر تھانہ علاقے میں ہفتے کی صبح ایک دردناک سڑک حادثے میں 5 افراد کی جان چلی گئی۔ ایک تیز رفتار سوئفٹ کار بے قابو ہو کر بھیل کھیڑی جوڑ پر واقع تالاب میں جا گری۔ حادثے کے بعد علاقے میں افراتفری مچ گئی۔ اطلاع ملتے ہی پولیس موقع پر پہنچ گئی اور گاؤں والوں کی مدد سے کار میں پھنسے لوگوں کو باہر نکال کر اسپتال پہنچایا، جہاں ڈاکٹروں نے سبھی کو مردہ قرار دے دیا۔ پولیس کے مطابق یہ حادثہ صبح میں اس وقت پیش آیا جب سوئفٹ کار (ایم پی-09-سی سی-6414) بھیل کھیڑی جوڑ کے پاس اچانک بے قابو ہو کر سیدھی تالاب میں گر گئی۔ کار میں کل 5 افراد سوار تھے۔ پانی میں ڈوبنے کی وجہ سے تمام لوگوں کی موقع پر ہی موت ہو گئی۔
واقعے کی اطلاع ملتے ہی کھجنیر تھانہ انچارج روی ٹھاکر پولیس فورس کے ساتھ موقع پر پہنچ گئے۔ مقامی لوگوں کی مدد سے کافی مشقت کے بعد کار کو تالاب سے باہر نکالا گیا۔ اس کے بعد کار میں پھنسے تمام لوگوں کو باہر نکال کر اسپتال بھیجا گیا لیکن ڈاکٹروں نے معائنے کے بعد پانچوں کو مردہ قرار دے دیا۔ ابتدائی تحقیقات میں یہ بات سامنے آئی ہے کہ حادثے کے وقت کار کے تمام دروازے اور شیشے بند تھے۔ اسی وجہ سے کار میں سوار افراد باہر نہیں نکل سکے اور پانی میں پھنس گئے۔ پولیس اور گاؤں والوں نے کار کے شیشے توڑ کر لوگوں کو باہر نکالنے کی کوشش کی، لیکن تب تک کافی دیر ہو چکی تھی۔پولیس نے جاں بحق ہونے والوں کی جیبوں سے ملنے والی دستاویزات کی بنیاد پر ان کی شناخت کرنے اور اہل خانہ سے رابطہ کرنے کا عمل شروع کر دیا ہے۔ ابتدائی معلومات کے مطابق جاں بحق ہونے والے افراد ارنیا خورد، اونتی پور بڑودیا، موہن بڑودیا اور ہتائی کھیڑا گاؤں کے رہنے والے بتائے جا رہے ہیں۔
