لکھنو28مارچ: اتر پردیش کے سنبھل میں رمضان المبارک کے آخری جمعہ کی نماز کے پیش نظر سکیورٹی کے سخت انتظامات کیے گئے ہیں۔ شاہی جامع مسجد سمیت شہر کی 400 سے زائد مساجد میں نمازِ جمعہ ادا کی جائے گی۔ اس موقع پر کسی بھی ناخوشگوار واقعے سے بچنے کے لیے پولیس، ریپڈ ایکشن فورس (آر اے ایف) اور سول پولیس نے فلیگ مارچ کیا۔ فلیگ مارچ کے دوران پولیس افسران نے سکیورٹی انتظامات کا جائزہ لیا اور ڈیوٹی پر تعینات اہلکاروں کو سختی سے مستعد رہنے کی ہدایت دی۔ علاقے میں 1300 سے زائد سی سی ٹی وی کیمروں اور ڈرونز کے ذریعے نگرانی کی جا رہی ہے۔ چند روز قبل سنبھل میں ہولی کے موقع پر کچھ بی جے پی لیڈران کی جانب سے دیے گئے متنازع بیانات کے بعد علاقے میں کشیدگی پائی جا رہی تھی۔ تاہم، پولیس کی سخت نگرانی کے باعث ہولی کا تہوار پرامن طریقے سے گزر گیا۔ اب عید قریب آنے کے سبب پولیس مزید الرٹ ہے اور عوام سے امن و امان برقرار رکھنے کی اپیل کر رہی ہے۔ پولیس حکام کا کہنا ہے کہ حساس علاقوں میں اضافی فورس تعینات کی گئی ہے، تاکہ کسی بھی ناخوشگوار صورتحال سے فوری نمٹا جا سکے۔ افسران نے عوام سے اشتعال انگیز افواہوں پر دھیان نہ دینے اور پولیس کے ساتھ تعاون کرنے کی اپیل کی ہے۔
