نئی دہلی 2اگست: دہلی میں پورنیہ کے ممبر پارلیمنٹ پپو یادو کی پریس کانفرنس کے دوران ہنگامہ اور دھکا مکی کا واقعہ سامنے آیا ہے۔ پپو یادو حال ہی میں پارلیمنٹ احاطے میں رام مندر کے چندے کی مبینہ چوری کے معاملے پر انوکھے احتجاج کو لے کر بھی خبروں میں رہے تھے۔ اس احتجاج میں وہ بھگوا کپڑے پہن کر نظر آئے تھے اور اپوزیشن کے ارکانِ پارلیمنٹ کے ساتھ مل کر رام مندر کے چندے کی مبینہ چوری کو لے کر احتجاج کیا تھا۔ احتجاج کے دوران ارکانِ پارلیمنٹ نے چندہ پیٹی میں پیسے ڈالنے اور پھر انہیں جیب میں رکھنے کی اداکاری کی تھی۔ اسی احتجاج کو لے کر پپو یادو سمیت اپوزیشن رہنماؤں پر سیاسی بیان بازی تیز ہوئی تھی۔ اب پریس کانفرنس کے دوران ان کے ساتھ دھکا مکی نے تنازع کو ایک بار پھر سرخیوں میں لا دیا ہے۔
واقعے کے بعد پپو یادو نے کہا کہ ان کے ہاتھ میں چاقو تھا، وہ لوگ مجھے مارنے آئے تھے۔ وہیں، بہار کے پورنیہ میں پپو یادو نے اس پورے تنازع اور ایف آئی آر کو لے کر کہا کہ “کیا مجھے بھگوا پہننے کا حق نہیں ہے؟ ایف آئی آر سے راہل گاندھی کبھی نہیں ڈرے، پرینکا گاندھی کبھی نہیں ڈریں، پھر پپو یادو کیسے ڈر جائے؟ سناتن اور بھگوان کے ساتھ غداری کرنے والوں کے خلاف، سناتن اور ہندوستان کے لوگوں کے عقیدے کی حفاظت کرنے کے لیے اگر پپو یادو کو مرنا ہوگا، میں ہر دن کفن باندھ کر نکلتا ہوں۔” پپو یادو کے اس بیان کے بعد رام مندر چندہ تنازع کو لے کر سیاسی بیان بازی مزید تیز ہونے کے اشارے ہیں۔
