بھوپال:12؍فروری: پسماندہ طبقات و اقلیتی فلاح کے وزیرِ مملکت (آزاد چارج) کرشنا گور نے جمعرات کو نئی دہلی میں مرکزی وزیرِ مملکت برائے اقلیتی امور جارج کُورین سے ملاقات کی۔ انہوں نے وزیرِ مملکت کُورین کو وزیرِ اعظم جن وکاس پروگرام کے تحت بھونپال میں “ڈاکٹر اے پی جے عبدالکلام سِمیولیٹری اسپیس سینٹر” کے قیام کی تجویز بھی پیش کی۔وزیرِ مملکت گور نے بتایا کہ حکومتِ ہند کی وزارتِ اقلیتی امور کے تحت چلائی جانے والی پی ایم جے وی کے (PMJVK) اسکیم اقلیتی اکثریتی علاقوں میں تعلیم، ہنر مندی کی ترقی اور بنیادی ڈھانچے کو مضبوط بنانے میں اہم کردار ادا کر رہی ہے۔ وزیرِ اعلیٰ ڈاکٹر موہن یادو کی دور اندیش قیادت میں ریاستی حکومت نوجوانوں میں سائنس، ٹیکنالوجی اور اختراع کو فروغ دینے اور طلبہ میں خلائی سائنس کے تئیں دلچسپی پیدا کرنے کے مقصد سے اس سینٹر کے قیام کے لیے پُرعزم ہے۔وزیرِ مملکت گور نے بتایا کہ مجوزہ مرکز کے ذریعے طلبہ اور نوجوانوں کو خلائی سائنس، فلکیات، سیٹلائٹ ٹیکنالوجی اور جدید سائنسی تحقیق سے روشناس کرایا جائے گا۔ یہ مرکز نوجوانوں کو مستقبل میں خلائی اور تکنیکی شعبوں میں کیریئر بنانے کے لیے ترغیب دے گا اور سائنسی تعلیم کو نئی سمت فراہم کرے گا۔وزیرِ مملکت گور نے مرکزی حکومت سے اس باوقار منصوبے کے لیے ضروری تکنیکی تعاون اور مالی معاونت فراہم کرنے کی درخواست کی تاکہ منصوبے پر جلد عمل درآمد یقینی بنایا جا سکے۔ انہوں نے یقین ظاہر کیا کہ یہ اقدام صوبے کے نوجوانوں کے لیے باعثِ تحریک ثابت ہوگا اور ترقی یافتہ بھارت کے ہدف کی سمت سائنس پر مبنی باصلاحیت نوجوان قوت کی تیاری میں اہم کردار ادا کرے گا۔
