سڈنی، 14 دسمبر (یو این آئی) آسٹریلیائی آل راؤنڈر کیمرون گرین نے منگل کو ہونے والی نیلامی میں خود کو آل راؤنڈر کی بجائے بلے باز کے طور پر درج کیے جانے کو اپنے مینیجر کی ‘غلطی قرار دیتے ہوئے کہا کہ وہ انڈین پریمیئر لیگ (آئی پی ایل) 2026 میں گیند بازی کے لیے دستیاب رہیں گے۔گرین نے دو کروڑ روپے کے بیس پرائس کے ساتھ نیلامی میں نام درج کرایا ہے اور بلے باز کے طور پر رجسٹریشن کرانے کی وجہ سے وہ نیلامی میں شامل ہونے والے پہلے چھ کھلاڑیوں میں شامل ہوں گے۔ گرین نے بتایا کہ ان کے مینیجر نے رجسٹریشن فارم بھرتے وقت ‘غلطی سے غلط باکس منتخب کر لیا تھا۔انہوں نے کہا کہ میں بالنگ کے لیے پوری طرح تیار رہوں گا۔ مجھے نہیں معلوم کہ میرے مینیجر کو یہ سن کر کیسا لگے گا، لیکن یہ ان کی طرف سے ہوئی ایک غلطی تھی۔ ان کا ارادہ ‘بلے باز لکھنے کا نہیں تھا۔ شاید انہوں نے غلطی سے غلط باکس منتخب کر لیا۔ یہ سب جس طرح سامنے آیا، وہ کافی دلچسپ تھا، لیکن دراصل یہ ان کی طرف سے ہوئی گڑبڑ تھی۔
چھبیس سالہ گرین پہلے ممبئی انڈینز (2023) اور رائل چیلنجرز بنگلور (2024) کے لیے کھیل چکے ہیں، لیکن کمر کی سرجری سے صحتیاب ہونے کے باعث وہ 2025 سیزن میں دستیاب نہیں تھے۔ انہوں نے جون میں بین الاقوامی کرکٹ میں بطور ماہر بلے باز واپسی کی تھی، لیکن بعد میں انہیں گیند بازی کی اجازت مل گئی اور موجودہ ایشیز میں آسٹریلیا نے انہیں آل راؤنڈر کے طور پر استعمال کیا ہے۔
