نوی ممبئی 3 نومبر (یو این آئی ) ہندوستانی ٹیم تاریخ میں پہلی بار آئی سی سی ویمنز ورلڈکپ چیمپئن بن گئی، فائنل میں جنوبی افریقا کو 52 رنز سے شکست دے کر یہ تاریخی کارنامہ انجام دیا ہے۔ نوی ممبئی میں کھیلے گئے فائنل مقابلے میں ٹاس جیت کر پورٹیز کپتان لورا ولوارٹ نے ہندوستان کو پہلے بیٹنگ کرنے کی دعوت دی جو ان کا غلط فیصلہ ثابت ہوا۔ ہندوستان کی ویمنز ٹیم نے مقررہ 50 اوورز میں 7 وکٹوں کے نقصان پر 298 رنز اسکور کیے، فائنل مقابلہ بارش کے باعث کچھ تاخیر سے شروع ہوا تاہم اوورز میں کسی قسم کی کٹوتی نہیں کی گئی۔
شفالی ورما نے 87 رنز کی اننگز تراشی، دپتی شرما 58 اور اسمرتی مندھانا 45 رنز بناسکیں، جنوبی افریقا کی جانب سے ایا بونگا کھاکا نے تین بیٹرز کو پویلین کی راہ دکھائی۔ جنوبی افریقی ٹیم 299 رنز کے ہدف کے تعاقب میں صرف 246 رنز بناسکی، پروٹیز کپتان لورا ولوارٹ کی شاندار سنچری رائیگاں گئی وہ 101 رنزبنا کر ہمت ہار گئیں۔
ہندوستان کی جانب سے دیپتی شرما نے عمدہ بولنگ کرتے ہوئے 5 وکٹیں حاصل کیں، شیفالی ورما 2 جنوبی افریقی ویمنز بیٹر کو آؤٹ کرنے میں کامیاب رہیں۔
آئی سی سی ویمنز ورلڈکپ فائنل میں آل راؤنڈ پرفارمنس پیش کرنے پر شیفالی ورما کو پلیئر آف دی میچ قرار دیا گیا جبکہ دیپتی شرما پلیئر آف دی ٹورنامنٹ قرار پائیں۔ ہندوستان کے پاس بیک وقت آئی سی سی کی تین ٹرافیاں آ گیئں ہیں۔ گزشتہ برس آئی سی سی ٹی 20 مینز ورلڈ کپ اور رواں برس آئی سی سی مینز چیمپئنز ٹرافی کی ٹرافیاں بی سی سی آئی کے شوکیس میں موجود ہیں۔
