لندن، 30 جولائی (یو این آئی) چوتھا ٹسٹ ڈرا کرنے کے بعد ہندوستانی ٹیم انگلینڈ کے خلاف جمعرات سے شروع ہونے والے پانچویں اور آخری ٹسٹ میں نئے جوش و جذبے کے ساتھ سیریز برابر کرنے کے ہدف کے ساتھ میدان میں اترے گی ۔ تاہم تیز گیند باز جسپریت بمراہ آخری ٹیسٹ میچ میں نہیں کھیلیں گے۔ ہندوستانی ٹیم پانچ میچوں کی سیریز میں 1-2 سے پیچھے ہے۔
جمعرات کو جب ہندوستان اور انگلینڈ کی ٹیمیں اوول کے میدان میں اتریں گی تو بہت کچھ داؤ پر ہو گا ۔ گزشتہ میچ کے ڈرا ہونے سے پرجوش ہندوستانی ٹیم جہاں اس میچ کو جیت کر سیریز ڈرا کرنے کی کوشش کرے گی وہیں انگلینڈ کی ٹیم اس میچ میں جیت درج کر کے سیریز اپنے نام کر نا چاہے گی۔ لارڈز اور مانچسٹر ٹیسٹ انتہائی ڈرامائی انداز میں ختم ہوا اور جس طرح اوول میں پریکٹس سیشن شروع ہوا ہے اس سے یہ میچ بھی کافی دلچسپ ہونے کا امکان ہے۔
مانچسٹر اور اوول ٹیسٹ کے درمیان صرف تین دن کا وقفہ ہے ، ہندوستان کے تیز گیند باز جسپریت بمراہ ورک لوڈ سسٹم کی وجہ سے اس میچ میں شرکت سے قاصر ہیں۔ محمد سراج پیس اٹیک کا آغاز کریں گے۔
امکان ہے کہ پرسدھ اور ارشدیپ سنگھ میں سے کسی ایک کو شامل کیا جائے ،رشبھ پنت کے اوول ٹیسٹ سے باہر ہونے کے بعد دھرو جوریل وکٹ کیپنگ اور مڈل آرڈر میں بیٹنگ کریں گے۔ جوریل کی ناتجربہ کاری، خاص طور پر انگلینڈ میں کھیلنے کا تجربہ ، ہندوستان کو بیٹنگ کی گہرائی فراہم کرنے کے لیے ٹھاکر کو برقرار رکھا جا سکتا ہے۔ اس کا مطلب یہ ہوگا کہ کلدیپ یادو کے لیے ایک بار پھر کوئی جگہ نہیں ہوگی۔ کلدیپ ضروریات کے لحاظ سے سرپلس ہوسکتے ہیں، خاص طور پر پچ اور ابر آلود حالات کو دیکھتے ہوئے جو ٹیسٹ کے دوران کلیدی کردار ادا کرسکتے ہیں۔ میچ سے دو دن قبل پچ پر کافی ہریالی تھی، اس لیے ہندوستان صرف رویندر جڈیجہ اور واشنگٹن سندر کی اسپن جوڑی کے ساتھ کھیل سکتا ہے۔اس کے علاوہ، اس ہوم سیزن میں اوول میں بولنگ کے اعداد و شمار زیادہ تر تیز گیند بازوں کے حق میں رہے ہیں،تیز گیند بازوں نے پانچ میچوں میں 150 میں سے 131 وکٹیں حاصل کیں۔ سرے نے اپنے ہوم گراؤنڈ پر دو بار کامیابی حاصل کی ہے اور تین ڈرا ہوئے ہیں، جن میں ڈرہم کے خلاف آخری میچ بھی شامل ہے، جہاں کاؤنٹی کرکٹ میں چوتھا سب سے زیادہ اسکور بنایا گیا تھا۔ ڈوم سیبلی کی ٹرپل سنچری کی بدولت سرے نے 9 وکٹوں پر 820 رنز بنائے، لیکن وہ میچ کوکابورا گیندوں سے کھیلا گیا، جو گزشتہ سال سے گیند بازوں کی صلاحیتوں کو نکھارنے کے لیے ای سی بی کی مہم کا حصہ ہے۔اس کے ساتھ ساتھ انگلینڈ کی ٹیم بھی اپنے تیز گیند بازوں کی تکان سے نبرد آزما ہے اور گس اٹکنسن اور جیمی اوورٹن کو تیز گیندبازی اٹیک میں موقع مل سکتا ہے۔ باقی ٹیم تقریباً وہی رہے گی۔
ان پرخاص توجہ ہوگی:
ارشدیپ سنگھ: حالیہ برسوں میں ہندوستان کے بہترین ٹی 20 گیند باز کے طور پر ابھرنے والے ارشدیپ کو اس میچ میں ٹیسٹ ڈیبیو کرنے کا موقع مل سکتا ہے۔ بائیں ہاتھ کا اینگل انہیں مختلف بناتا ہے، اس کے علاوہ انہیں کینٹ کے لیے کاؤنٹی کرکٹ کھیلنے کا تجربہ بھی ہے۔ ارشدیپ بین الاقوامی کرکٹ میں اپنی وابستگیوں کی وجہ سے پچھلے کچھ سالوں میں ریڈ بال ڈومیسٹک کرکٹ میں باقاعدگی سے حصہ نہیں لے سکے ہیں، انہوں نے 21 فرسٹ کلاس میچوں میں تقریباً 30 کی اوسط سے 66 وکٹیں حاصل کی ہیں۔
بین اسٹوکس: انگلش کپتان، جنہوں نے اس سیریز میں 140 اوورز کرائے، اس سیریز میں سب سے زیادہ 17 وکٹیں حاصل کیں۔ انہوں نے مشکل حالات اور غیرمعاون پچوں کے باوجود تقریباً ہر میچ میں مسلسل بولنگ کی ہے اور اہم میچوں میں وکٹیں حاصل کی ہیں۔
